Në komunën e Trancoso-s, 350 kilometra në verilindje të Lisbonës, flakët kanë përpirë sipërfaqe të gjera pylli.
Zjarri, i nxitur nga vapa përvëluese dhe erërat e forta, ka kërcënuar edhe fshatrat përreth.
Mbi 700 zjarrfikës janë në vijën e parë, duke u përpjekur të përmbajnë flakët ndërsa Portugalia përballet me një tjetër sezon brutal zjarresh.
Përtej kufirit, në Spanjë, situata është po aq e rëndë. Mijëra njerëz janë urdhëruar të evakuohen në rajone si Kastilja dhe Leoni, Andaluzia dhe Galicia.
Zjarret vazhdojnë të digjen në të gjithë Gadishullin Iberik ndërsa temperaturat kalojnë 40 gradë Celsius.
Rekorde të reja kombëtare të nxehtësisë u raportuan edhe në Kroaci, me temperaturat e regjistruara prej 39.5°C në Shibenik dhe 38.9°C në Dubrovnik.
Kurse, në Francën jugperëndimore, Météo France raportoi temperatura të jashtëzakonshme – deri në 12 gradë mbi mesataren historike.
Zjarret u përhapën poashtu përgjatë bregdetit Adriatik dhe në vendet fqinje të Ballkanit, duke kërcënuar shtëpitë, turizmin dhe infrastrukturën jetësore.
Në Greqi, zjarrfikësit nga Rumania dhe Republika Çeke bashkuan përpjekjet për të shuar zjarret pranë Patras dhe në disa ishuj grekë.
Alarmet në telefonat celularë u bënë thirrje banorëve dhe turistëve të evakuohen. Associated Press ka raportuar se më shumë se 20 zjarre të mëdha kanë shpërthyer në të gjithë vendin.
Situatë më e mirë nuk është as në Itali, ku Mali Vezuv i Italisë ka ditë që digjet.
Zjarrfikësit kanë thënë se kanë reaguar ndaj më shumë se 45,000 incidenteve të zjarrit që nga mesi i qershorit – një rritje dramatike krahasuar me vitin e kaluar.
Por nxehtësia ekstreme nuk ka prekur vetëm kontinentin evropian. Në të gjithë Kanadanë, ka pasur dhjetëra rekorde të temperaturës.
Në Rrethin Arktik, vendet nordike ende po përballen me temperatura mbi 30°C – të padëgjuara deri më tani në veri.
Sipas Shërbimit të Ndryshimeve Klimatike Kopernikus të BE-së, Evropa po ngrohet me dyfishin e mesatares globale.
Viti 2024 ishte viti më i nxehtë i regjistruar ndonjëherë – si në kontinent evropian ashtu edhe në mbarë botën.
Shkencëtarët paralajmërojnë se rritja e temperaturave globale po i bën valët e nxehtësisë më ekstreme dhe zjarret më të shpeshta dhe intensive./teve1/
