Kompania Telkos ka dhuruar mbi 200 tituj të rinj librash për bibliotekën e Universitetit Publik “Kadri Zeka”. Librat janë kryesisht nga fusha e marrëdhënieve ndërkombëtare, studimeve evropiane, integrimeve ndërkombëtare dhe historisë, ndërsa shumica prej tyre janë në gjuhën angleze.
Vlera e këtij donacioni është mbi 2 mijë euro dhe paraqet donacionin e dytë të kompanisë TELKOS për universitetin, pas investimit të mëhershëm në Laboratorin e Shkencave Sociale.
Me këtë rast, Dekani i Fakultetit të Shkencave Sociale, Porf. Asoc. Dr. Selim Daku, ka falënderuar kompaninë TELKOS për mbështetjen e vazhdueshme ndaj arsimit dhe studentëve. “E vlerësojmë dhe e çmojmë kontributin tuaj të TELKOS. Investimi në libra është strategji, sepse nga to dalin kuadro të përgatitura që do t’i shërbejnë këtij institucioni, këtij vendi dhe këtij shteti. Dëshirojmë të shohim fryte dhe duam të bëjmë ndryshimin, edhe nëse ai vjen më vonë”, tha dekani Daku.
Ndërkaq, drejtori i kompanisë TELKOS, Vedat Morina, tha se investimi në të rinjtë dhe në dije mbetet një mision i rëndësishëm për kompaninë. “Është mirë që mundemi me kontribu për shoqërinë. Teknologjia po ndryshon vazhdimisht dhe të rinjtë, nëse nuk marrin libra të rinj me lexu, nuk munden me arritë. Është një mision shumë i madh me kontribu për të rinjtë. Kjo na bën krenarë”, u shpreh Morina.
Gjithashtu, Udhëheqësja e Divizionit të Bibliotekës Universitare, Labinota Ramadani, theksoi rëndësinë që ka ky donacion për studentët dhe stafin e universitetit. “Ky donacion ka një rëndësi të veçantë për bibliotekën universitare, pasi pasuron fondin me literaturë bashkëkohore dhe shumë të nevojshme për studentët dhe stafin. Librat nga fusha e marrëdhënieve ndërkombëtare, studimeve evropiane dhe historisë do të jenë një ndihmë e madhe në studime, hulumtime dhe zhvillim profesional”, tha Ramadani.
Nga Universiteti Publik “Kadri Zeka” u vlerësua se donacione të tilla ndikojnë drejtpërdrejt në ngritjen e cilësisë së studimeve dhe krijimin e kuadrove profesionale që do t’i shërbejnë vendit në të ardhmen.
