21 nëntori shënoi “Ditën Botërore të Televizionit”. Kjo ditë, profesori universitar në Departamentin e Gazetarisë, Alban Zeneli, thotë se televizionin e gjen në si burimin më të besueshëm të informacionit, ndërsa interesimi për televizionin është i madh edhe tek studentët që ndjekin studimet në Departamentin e Gazetarisë.
Këtë zanat e ushtron për mbi 40 vjet.
E në duart e mjeshtrit, Fazli Ramadani, u rregulluan shumë televizorë.
Madje, puna shtohej edhe më shumë në prag të festave.
“Brenda një nate i kemi rregulluar 25 deri në 50 televizor, ndërsa sot nuk je në gjendje një apo dy me i rregulluar. Në të kaluarën ka pasur punë më shumë, edhe kemi qenë më të kënaqur dhe s’kemi pasur stres prej tyre, sepse ekranet i kanë pasur të trashë dhe s’kemi pas frikë mos po e dëmtojmë”, tha mjeshtri i televizorëve, Fazli Ramadani.
Por,vëmendja që dikur ishte rreth kësaj pajisje, duket se ka rënë së fundmi.
“Ka interesim, por tani kanë bërë edhe telefona shumë, po informohen edhe përmes telefonave, me lajme etj, por edhe për televizorë ka interesim”, tha Ramadani.
Por kjo pajisje do të mbetej e vdekur, pa prezencën e televizioneve.
Profesori universitar në Departamentin e Gazetarisë, Alban Zeneli, thotë ajo çka e karakterizon televizionin, është besueshmëria.
“Ajo se çfarë është e rëndësishme për televizionin, është besueshmëri, sepse të gjitha matjet tregojnë që mediet sociale konsumohen më shumë, por televizioni besohet akoma më shumë se të gjitha llojet e tjera të medieve”, deklaroi profesori universitar, Alban Zeneli.
Zeneli thotë se interesimi i studentëve për televizionin nuk ka rënë.
“Interesimi është më i madh se kurrë, por jo në televizionin që është në formën tradicionale që e kemi kuptuar dikur në kohën më përpara, të rinjtë janë të interesuar në llojin e komunikimit përmes televizionit, pra përmes videos, qofshin ato video që shfaqën në mediet sociale ose në televizion”, u shpreh Zeneli.
Ndryshe në vitin 1996, Asambleja e Përgjithshme e Kombeve të Bashkuara e shpalli 21 nëntorin si “Ditën Botërore të Televizionit”