Një pikë e përbashkët ajo e Telekomit dhe Postës së Kosovës pritet të hapet këtë javë në sheshin e veriut të Mitrovicës. Televizioni ka mësuar se në këtë pikë do të ketë të punësuar edhe nga radhët e komunitetit serb. Qytetarët janë të ndarë në mendime, ata të komunitetit shqiptar thonë se ky veprim është i qëlluar meqë sipas tyre po shtrihet ligjshmëria në këtë zonë. Ndërsa ata të komunitetit serb thanë për televizionin se nuk do të kryejnë shërbime meqë kërkuan të jetë edhe Posta e Serbisë. Posta e Republikë së Kosovës muaj më parë është hapur edhe në Banjskë të Zveçanit në “Rajska Banja”.
Muaj më parë, Posta e Kosovës u hap në Banjskë të Zveçanit.
E pas privatizimit të disa objekteve dhe shpalljes së tenderëve publik, institucionet e Kosovës po fillojnë shtrirjen e tyre në komunat veriore.
Ngjashëm po ndodh edhe në veri të Mitrovicës ku së shpejti pritet të hapet një degë e re e përbashkët për komunitetin serb dhe shqiptar.
Televizioni ka mësuar përmes burimeve se në këtë pikë, në qendër të sheshit “Car Lazar” do të ketë të punësuar edhe nga radhët e komunitetit serb.
Tëvë1 merr vesh se të premten gjithçka do të funksionalizohet për të kryer shërbimet sipas ligjeve të Kosovës.
E qytetarët janë të ndarë për këto veprime të shtetit.
Ata nga radhët e komunitetit shqiptar, e shohin të nevojshme hapjen Postës dhe Telekomit në veri.
“Mu po më duket shumë mirë mirë, ma mirë s’ka qysh bëhet, situata është qetë nuk ka asnjë problemi kemi shëtit gjithkah me veturë”, tha një qytetar.
“E shoh si gjest t’mirë, se këtu shihet që kanë filluar ligji i Kosovës me ardhë në shprehje që në këtë pjesë të Mitrovicës me u hap edhe posta, vala e Kosovës dhe të gjitha”, tha Sami Lushtaku – qytetar.
Ndërsa qytetarët e komunitetit serb thonë se nuk pritet të kryhen shërbime në Telekom e Postën e Kosovës, meqë sipas tyre, do duhet të ishte dhe Posta e Serbisë.
“Jo të gjithë vjedhin punën e tyre në shpinë e popullit. Nëse mund të thuhet ashtu. Nuk e di, do të ishte mirë pranë saj të ishte edhe posta serbe, apo jo, do të ishte bukur”, tha një qytetar.
“Çka mungon, e kemi njërën edhe këtë tjetrën tash. Do të ishte shumë bukur të kishim edhe një. Do ta shohim çfarë do të bëhet nuk kemi cfarë të presim. Pres shërbime, por nuk e di nëse do të mund të marr ndonjë shërbim, nuk shoh gjë”, tha një tjetër qytetar.
Në anën tjetër një biznes afër lokalit ku do të hapet Telekomi dhe Posta e Kosovës, ka vendosur disa karrige në hapësirat publike, për çka aty erdhi edhe Policia e Kosovës për të kërkuar lirimin e hapësirës.
Të njëjtit kujdeseshin edhe për sigurinë publike.
