Në mbrëmjen e sotme pas të shtëna me armë zjarri në rrugën “Qamil Hoxha” në Prishtinë, kanë mbetur të lënduar dy persona.
Shefi i Emergjencës, Avdush Bajgora, për televizionin Tëvë1, ka bërë të ditur se gjendja e të lënduarve është jashtë rrezikut për jetë.
Bajgora ka thënë se njëri nga të lënduarit është plagosur me armë zjarri, ndërsa tjetri ka marrë lëndime serioze me mjetë të mprehtë, i cili është lënduar në fytyrë.
“Në orët e vona janë sjellë dy të rinj, njëri i moshës 24-vjeçare, tjetri i moshës përafërsisht 25-vjeçare. Ka qenë njëri i lënduar me armë zjarri në krurisin e majtë, ka qenë plaga tejshkuese dhe me parametra vitale ka qenë stabil. D.m.th., është jashtë rrezikut për jetë, për çështje të observimit është dërguar në Klinikën e Ortopedisë”, ka treguar Bajgora.
“Ndërsa, tjetri ka qenë i lënduar me mjetë të mprehtë në regjionin e fytyrës. Lëndimet kanë qenë serioze, mirëpo edhe ai është jashtë rrezikut për jetë. Momentalisht është duke u kryer intervenimi nga kirurgët e Kirurgjisë Maksilofaciale dhe sipas të gjitha gjasave do të ndalet për trajtim të mëtejmë në Kirurgjinë Maksilofaciale”, ka thënë shefi i Emergjencës.
Rasti është konfirmuar edhe nga Policia e Kosovës, të cilët kanë bërë të ditur se personat e dyshuar janë identifikuar dhe hetuesit policorë në koordinim me Prokurorinë janë duke hetuar rastin për ndriçimin e plotë të rrethanave.
“Rreth orës 20:20, policia ka marrë informatën për të shtëna me armë në rrugën Qamil Hoxha në Prishtinë. Menjëherë pas marrjes së informatës policia ka dalë në vendin e ngjarjes dhe ka ndërmarrë të gjitha veprimet e nevojshme që konsistojnë në hetimin e rrethanave që karakterizojnë ngjarjen. Bazuar në informacionet e para raportohet për dy persona të lënduar, njëri nga ta dyshohet të ketë marrë lëndime nga arma e zjarrit. Personat e lënduar janë dërguar për trajtim mjekësor. Hetuesit policor në koordinim me prokurorinë, po ndërmarrin veprimet hetimore për ndriçimin e plotë të rastit dhe janë në kërkim të personave të dyshuar të cilët tashmë janë identifikuar nga ana e policisë”, ka thënë zëdhënësja e Policisë për Rajonin e Prishtinës, Flora Ahmeti.
https://teve1.info/lajmet/dy-persona-te-lenduar-nga-te-shtenat-me-arme-zjarri-ne-prishtine/
