Një incident me armë zjarri është raportuar të mërkurën mbrëma në rrugën “Driton Islami” në Ferizaj, pas një mosmarrëveshjeje mes disa personave.
Sipas njoftimit të Policisë së Kosovës, gjatë incidentit janë dëgjuar të shtëna me armë zjarri, ndërsa të dyshuarit fillimisht janë larguar nga vendi i ngjarjes.
Në lokacion është gjetur dhe konfiskuar një gëzhojë.
Pas veprimeve hetimore, policia ka identifikuar tre të dyshuar, prej të cilëve dy janë arrestuar. Gjatë arrestimit, nga ta janë sekuestruar një armë zjarri – pistoletë, dy mjete të mprehta dhe një shufër metali.
Me vendim të prokurorit, dy të dyshuarit janë dërguar në mbajtje, ndërsa rasti po trajtohet sipas procedurave të mëtejme hetimore.
“Raportohet se pas një mosmarrëveshje në mes të disa të dyshuarve meshkuj kosovar, kishte pasur edhe të shtëna me armë zjarri. Të dyshuarit janë larguar në drejtim të panjohur. Në vendin e ngjarjes është gjetur dhe konfiskuar një gëzhojë. Gjatë hetimeve të rastit janë identifikuar tre të dyshuar meshkuj kosovarë, dy prej të cilëve janë arrestuar dhe nga ta janë konfiskuar: një armë zjarri pistoletë, dy mjete të mprehta dhe një shufër metali. Dy të dyshuarit pas intervistimit me vendim të prokurorit janë dërguar në mbajtje. Rasti i nënshtrohet procedurave të mëtejme hetimore”, thuhet në njoftim. /teve1.info/
