Policia e Kosovës ka arrestuar tre persona në Suharekë nën dyshimet se kanë kryer veprën penale vrasje në tentativë.
Zëdhënësi i policisë rajonale për Prizren Shaqir Bytyqi ka bërë të ditur për teve1.info se incidenti ka ndodhur sot rreth orës 02:05 të mëngjesit në Topliçan të Suharekës, ku ka mbetur e plagosur edhe një femër dhe janë lënduar 6 persona të tjerë.
Ai ka bërë të ditur se të dyshuarit janë larguar nga vendi i ngjarjes menjëherë, ndërkohë që policia ka nisur menjëherë aksionin për arrestimin e tyre.
“Pas një zënke, një person i shoqëruar edhe nga dy shokë, nga parkingu i një lokali nate në Topliçan të Suharekës ka shtënë me armë zjarri në drejtim të lokalit. Si pasojë një femër është plagosur në këmbë nga plumbi dhe 6 persona të tjerë kanë pësuar lëndime të lehta trupore nga xhamat”, ka thënë ai.
“Dy të dyshuar Ç.S. (22) dhe A.A. (23) nga Suhareka pasi që janë intervistuar me urdhër të prokurorit kujdestarë janë ndaluar për 48 orë, ndërsa i dyshuari i tretë, A.D. (18) është liruar me procedurë të rregullt. Gjithashtu është gjetur dhe sekuestruar edhe arma që dyshohet se është përdor për kryerjen e veprës”.
