Sot rreth orës 22:40 janë dëgjuar të shtëna me armë zjarri në sheshin “Skënderbeu” në Prishtinë, në zonën ku aktualisht po mbahet festivali “Akull n’Verë”.
Rastin e ka konfirmuar për Tëvë1 zëdhënësja e Policisë për rajonin e Prishtinës, Flora Ahmeti.
“Sot rreth orës 22:40 kemi marrë informatën për të shtëna me armë zjarri në sheshin ‘Skënderbeu’ në Prishtinë. Njësitet policore menjëherë kanë dalë në vendin e ngjarjes, ku kanë arrestuar personin e dyshuar dhe kanë sekuestruar një armë”, deklaroi Ahmeti.
Sipas saj, fatmirësisht nuk raportohet për persona të lënduar.
Policia ka rrethuar zonën ku ndodhi incidenti, përkatësisht pjesën e sheshit ku janë vendosur shtëpizat e festivalit. Hetuesit policorë kanë nisur një hetim lidhur me rrethanat e këtij rasti.
