Mbrëmjen e djeshme janë raportuar për të shtëna me armë zjarri në fshatin Bajnicë të Kaçanikut.
Në njoftimin e Policisë së Kosovës thuhet se njësitë relevante kanë dalë në vendin e ngjarjes, ku dyshohej se persona të panjohur, me një veturë me targa vendore, kishin hyrë në zonën malore dhe kishin shtënë me armë automatike të tipit AK-47, duke zbrazur rreth dy karikatorë në ajër.
Pas ekzaminimit të vendit të ngjarjes, hetuesit kanë gjetur gjithsej 49 gëzhoja. Më vonë, është lokalizuar edhe vetura e dyshuar, e cila është gjetur e parkuar në një autoservis.
Si rezultat i hetimeve, është identifikuar i dyshuari me inicialet E.S., 26 vjeç, tek i cili është sekuestruar një pushkë automatike AK-47 dhe 35 fishekë.
I dyshuari është shoqëruar në stacionin policor në Kaçanik, ku është intervistuar. Me vendim të prokurorit të shtetit, është iniciuar rasti për “Përdorim të armës apo mjetit të rrezikshëm”, ndërsa ai është liruar në procedurë të rregullt.
