Në Bibliotekën e qytetit në Gjakovë me fillim prej orës 11:00 ishte paraparë mbërritja e delegacionit të Shqipërisë për mbledhjen e përbashkët me Qeverinë e Kosovës. Vetëm një ditë para mbledhjes së planifikuar, kryeministri i Shqipërisë, Edi Rama, anuloi pjesëmarrjen e kabinetit të tij. Për këtë, Kurti tha se mbledhja e qeverive nuk mund të zëvendësohet me takime të tjera.
Gjakova nuk arriti t’i përbashkonte dy qeveritë shqiptare.
Përgatitjet e bëra deri në detajin më të vogël, shkuan huq.
E gatshme për anëtarët e Qeverisë së Kosovës dhe asaj të Shqipërisë, ishte tavolina ku do të zhvillohej mbledhja, si dhe aty ku planifikohej nënshkrimi i 13 marrëveshjeve mes dy vendeve.
Hapësira e destinuar për fotografi, kishte edhe emrat e shënuar se ku do të pozicionoheshin secili prej ministrave.
Të gjitha këto përgatitje i kishin marrë dy muaj kohë stafit të pallatit të kulturës në Gjakovë.
“I pari i Gjakovës, mirëkuptoi anulimin e këtij organizimi, pasi sipas tij me tensionet në veri kjo ngjarje nuk do e kishte efektin e vet”, tha Demokrat Zhubi – koordinator i pallatit të kulturës “Asim Vokshi”.
E reagimi i kryeministrit Albin Kurti, vjen një ditë pas anulimit, duke potencuar se mbledhja e qeverive nuk mund të zëvendësohet me takime tjera.
Përmes një konferencë të jashtëzakonshme, kryeministri i Shqipërisë, Edi Rama, njoftoi anulimin e kësaj mbledhje të qeverisë.
Sipas tij shkaku i gjendjes në veri, kjo mbledhje duhet të zhvillohet në një format tjetër, por këtë propozim, nuk e pranoi kryeministri Kurti.
