Në 24 orët e fundit, të paktën 118 palestinezë janë vrarë dhe 581 të tjerë janë plagosur në sulmet izraelite në Gaza, sipas Ministrisë së Shëndetësisë së enklavës.
Në mesin e viktimave janë 12 persona të vrarë dhe 49 të plagosur në qendrat e ndihmës që mbështeten nga SHBA-ja dhe Izraeli, duke rritur numrin e përgjithshëm të kërkuesve të ndihmës të vrarë në këto pika në 652. Që prej hyrjes në fuqi të mekanizmit të ri më 27 maj, mbi 4,537 persona janë plagosur.
Organizata ndërkombëtare Amnesty International ka akuzuar Izraelin për përdorimin e qëllimshëm të urisë si armë lufte në Gaza, duke e cilësuar këtë si pjesë të një politike më të gjerë të gjenocidit.
Agnes Callamard, drejtoresha e Amnesty International, deklaroi se ndërsa vëmendja e botës ishte e përqendruar te përleshjet mes Izraelit dhe Iranit, “gjenocidi i Izraelit ka vazhduar pa ndërprerje në Gaza, përfshirë krijimin e kushteve të jetesës që kanë sjellë një përzierje vdekjeprurëse urie dhe sëmundjeje, duke e çuar popullatën në kufijtë e thyerjes.”
Raporti i organizatës përshkruan kequshqyerjen e rëndë mes fëmijëve, me 66 vdekje që nga tetori i vitit të kaluar dhe mijëra të tjerë të hospitalizuar, ka shkruar Al Jazeera.
Gjithashtu, Amnesty International akuzon autoritetet izraelite për përdorimin e ndihmës si armë, duke vendosur një bllokadë të paligjshme mbi hyrjen e ndihmave dhe mallrave tregtare në Gaza.
Aktualisht, qindra kamionë me ndihma janë bllokuar jashtë enklavës palestineze, duke pritur leje nga Izraeli për të hyrë.
Në këtë kontekst, Francesca Albanese, raportuesja speciale e Kombeve të Bashkuara për të drejtat e njeriut në territorin e pushtuar palestinez, ka bërë thirrje për vendosjen e një embargoje të plotë armësh dhe për ndërprerjen e lidhjeve tregtare dhe financiare me Izraelin.
Ajo ka akuzuar Izraelin për kryerjen e një “fushate gjenocidale” në Gaza.
Që nga 7 tetori 2023, lufta e Izraelit në Gaza ka shkaktuar vdekjen e 57,130 palestinezëve dhe plagosjen e 135,173 të tjerëve, sipas një deklarate të Ministrisë së Shëndetësisë të publikuar në Telegram.
