Dy personat të cilët dyshohet që vranë policin në Kaçanik, u larguan nga pista e krimit.
Ata edhe pas më shumë se 20 orëve vazhdojnë të mbesin në arrati.
Lista e personave të cilët dyshohen për krime të rënda por megjithatë vazhdojnë të jenë të lirë është e gjatë.
Alban Gashi i cili dyshohet që vrau me 25 mars Naser Gashin, ende nuk është arrestuar nga Policia e Kosovës.
Nga vendi krimit u larguan edhe tre personat e përfshirë në plaçkitjen e armatosur me 17 mars në Albi Mall e të cilët ende nuk janë kapur nga institucionet e sigurisë.
E që më shumë se 10 muaj, nga duart e institucioneve të drejtësisë u largua edhe Enver Sekiraqa i cili dyshohet të jetë i përfshirë në vrasjen e Triumf Rizës.
Kurse që mbi 13 vjet, i dyshuari për vrasjen e Diana Kastratit është duke vazhduar jetën i lirë në Spanjë.
E këta nuk janë të vetmit që kërkohen nga Policia e Kosovës. Puna e këtyre të fundit, vlerësohet se po vështirësohet për shkak të fqinjit verior.
“Këtu në Kosovë është një problem për shkak të kufirit me Serbinë është i qasshëm edhe me Serbinë nuk kemi marrëveshje bashkëpunimi edhe këtu e gjejnë ata atë strofullin e tyre.Në këtë drejtim nuk është që Policia e Kosovës është dobët dhe nuk po mund të zë se kjo ndodh edhe në shtete e tjera prandaj kemi raste të shumta të ekstradimit mes shteteve”, vlerëson avokatja, Fehmije Gashi Bytyqi.
Madje edhe mos anëtarësimi i Kosovës në Interpol sipas avokates Gashi – Bytyçi ndikon që këta persona të mos sillen para drejtësisë.
“Këto raste kur personat janë në arrati një herë për veprat që janë me peshë më të ulët, policia lëshon stop listën e cila vendoset në të gjitha stacionet policore anekënd Kosovës në vijat kufitare kjo është për vepra me peshë me të ulët. Ndërsa sa i përket vrasjes pavarësisht faktit që Kosova nuk është pjesë e Interpolit për shkak që Interpoli është polici në Kuadër të OBK-së megjithatë ka bashkëpunim, ekziston ligji juridik ndërkombëtar bashkëpunim me shtete që e kanë njohur Kosovën”, thotë ajo.
Kurse sipas avokatit Ardian Bajraktarit, ani pse Kosova ka bashkëpunime juridike me disa shtet, arrestimi i personave të cilët kanë vepër penale e të cilët gjendet në arrati merr kohë.
“Një pjesë jo e vogël e tyre mund të lëvizin edhe jashtë Kosovës mandej vjen në shprehje edhe mekanizmi i bashkëpunimit juridik ndërkombëtar i cili në disa raste mund të merr kohë edhe deri transferimi i tyre dhe vënia e tyre para drejtësisë për tu ballafaquar me veprën penale”, shprehet Bajraktari.
Televizioni ka dërguar pyetje edhe në Policinë e Kosovës rreth numrit të personave që gjenden në arrati por deri në publikimin e kronikës nuk ka marrë përgjigje.
