Java e ardhshme do të shënoj nisjen e një prej gjykimeve të rëndësishme në mungesë, për krimet e luftës në Kosovë.
Për plot 21 të akuzuar, do të nis gjykimi pa praninë e tyre, për shkak se deri më tani ata janë të paarritshëm për organet e drejtësisë.
Për ta, ftesa për seancë është publikuar në Gazetën Zyrtare.
E ngjajshëm është vepruar edhe për 21 të akuzuarit e tjerë, si të akuzuar për krime lufte në Reçak.
Edhe kjo lëndë do të procedohet si gjykim në mungesë, meqë të njëjtit ndodhen jashtë territorit të Kosovës.
E si veprim i dobishëm për të akuzuarit që gjykohen në mungesë, konsiderohet publikimi i materialeve në Gazetë Zyrtare.
“Edhe ftesat publikohen në Gazetën Zyrtare ashtu siç parashihet edhe me ndryshimet të Kodit të Procedurës Penale për këto vepra penale që gjykohen në mungesë. Dhe e dyta, edhe aktakuza publikohet në faqen e prokurorisë që të paktën individi që nuk është i qasshëm osë është në një shtet me të cilin Kosova nuk ka bashkëpunim juridik ndërkombëtar, e rrjedhimisht nuk mund as të ekstradohet, të paktën i njëjti të mund të ketë të drejtë që të disponojë aktakuzë, ftesat e materialet e tjera”, tha avokati Asdren Bytyqi.
Edhe në këto raste, kërkohet që të zhvillohet një proces i drejtë dhe i paanshëm.
“Gjithmonë duhet të kemi parasysh se kjo çështje duhet të ketë një standard, siç e parasheh edhe Konventa Evropiane mbi Liritë dhe të Drejtat e Njeriut, neni 116, që të zhvillohet një gjykim i drejtë dhe i paanshëm, me prova të mjaftueshme që vërtetojnë se i akuzuari ka kryer veprën apo nëse Gjykata vlerëson se nuk ka prova të mjaftueshme atëherë të refuzojë akuzën”, tha avokati, Hasan Shala.
Muaji shtator, do të shënojë fillimin e një gjyqi tjetër në mungesë, për krimet e luftës që dyshohet se janë kryer në rrethinën e Fushë Kosovës, nga Predrag Nikolic, Zoran Deletovic, Ivan Ivanov, Sinisa Milanovic dhe Jovica Denic.
Në Gazetë Zyrtare, është publikuar edhe aktakuza ndaj Vitomir Naskovic, i cili akuzohet për vrasje, maltretime, djegie e dëbime të shqiptarëve gjatë viteve 98-99, në komunën e Suharekës.
