Kryetari i Sindikatës së Trepçës, Ibrahim Jonuzi, lidhur me mos ekzekutimin e pagave për muajin qershor për minatorët e Trepçës është shprehur se nuk ka pasur komunikim as me ministren e Ekonomisë Artane Rizvanolli e as me Qeverinë.
Ai tha se ministrja Rizvanolli është takuar vetëm me disa grupe të caktuara të minatorëve.
“Ministrja Rizvanolli më parë takohet me grupe të caktuara të minatorëve sesa me sindikatën që është e vetmja legjitime dhe institucioni i vetëm që përfaqëson interesat e minatorëve.Ata po gjejnë kohë dhe hapësirë që të takohen nëpër kafene në qytetin e Vushtrrisë mirëpo asnjëhere nëpër rrugët zyrtare apo institucionet me të cilat e kanë obligim ligjor të takohen dhe të diskutojnë për problematikat në ndërmarrje”, ka thënë ai në emisionin “Ditari” në Tëvë1.
Ai bëri të ditur se pagat duhet të ekzekutohen para se minatorët të mendojnë që të shkojnë drejtë grevës.
“Këtë e ka pasur në dorë Qeveria e Kosovës edhe të gjitha këto ka mund t’ i parandalojë se nuk është që kemi dashur të grevojmë mirëpo kemi grevuar kundër keqmenaxhimit dhe padrejtësive që i janë bërë minatorëve dhe për kërkesa më të mira pune dhe sigurimin e pagës në kohë mirëpo qeveria gjithmonë ka heshtur dhe na ka injoruar”, tha ai./teve1.info.
Minatorët e Trepçës për më shumë se dy javë nuk kanë punuar për shkak të mos marrjes së pagës. Ata kanë thënë se ende nuk kanë marrë pagën e qershorit.
Nga menaxhmenti ditë më parë kanë thënë se nuk ka njohuri se kur do të ekzekutohen pagat, duke u bërë thirrje minatorëve të ndërpresin grevën./teve1.info/
