Kthimi i shumëpritur i sulmuesit Vedat Muriqi te skuadra e Mallorcas duket se nuk është larg. Sulmuesi i Përfaqësueses së Kosovës ka qenë befasia e madhe në seancën stërvitore të ekipit spanjoll që u mbajt të martën paradite.
Muriqi, i cili u lëndua në nëntor, stërviti pa telashe me pjesën tjetër të ekipit. Para stërvitjes, Muriqi u mirëprit me “tunelin” tradicional të krijuar nga bashkëlojtarët, duke sinjalizuar se kthimi i tij në fushë e lojës është afër.
“Befasia më e madhe në seancën e paradites ishte paraqitja e Vedat Muriqit që stërviti normalisht me pjesën tjetër të lojtarëve. Rikthimi i tij në stërvitje ka gëzuar të gjithë te Mallorca pasi kjo do të thotë se ai pothuajse është rikuperuar plotësisht nga lëndimi dhe do të jetë gati së shpejti për lojë”, ka shkruar “Diario de Mallorca”.
Muriqi 29-vjeçar u dëmtua më 12 nëntor në ndeshjen kualifikuese për “Euro 2024” që Kosova e fitoi 1:0 ndaj Izraelit në Prishtinë. Që nga ajo kohë gjiganti i sulmit ka qenë mungesa më e madhe e trajnerit të Mallorcas, Javier Aguirre. Fillimisht pritej që Muriqi të kthehej në fillim të këtij muaji, por më pak kthimi i tij u tha se u shty për gjysmën e muajit të ardhshëm.
Shkaku i lëndimit, Muriqi i ka munguar Mallorcas në nëntë ndeshjet e fundit, përfshirë këtu shtatë në kuadër të La Ligas ku ekipi ka regjistruar dy fitore, tri barazime dhe dy humbje. Edhe pse javën e shkuar u paralajmërua se Muriqi nuk do të jetë i gatshëm për lojë deri muajin tjetër, te Mallorca janë optimistë se ai mund të rikthehet më herët.
Duke pasur parasysh atë që sulmuesi tregoi në stërvitjen e parë pas rikthimit nga lëndimi, shpresat tani janë që Muriqi të jetë gati në fund të këtij muaji apo fillim të muajit tjetër.
Më 27 janar, Mallorca luan në shtëpi kundër Real Betisit, ndërsa më 4 shkurt përballet në udhëtim me Athletic Bilbaon.
“Përkundër faktit se Javier Aguirre paralajmëroi kthimin e numrit 7 në shkurt, ai mund të jetë i gatshëm për lojë më herët. Muriqi ka përballuar me sukses stërvitjen e parë dhe nuk ka shfaqur asnjë problem, duke ushtruar normalisht me pjesën tjetër të grupit”, ka shkruar “Diario de Mallorca”, medium i afërt me skuadrën.
“Në klub nuk e kanë ndërmend ta detyrojnë sulmuesin të kthehet para kohe, pasi dëmtimi i tij ka qenë më i ndërlikuar se sa pritej ndonëse Muriqi mbetet lojtar tejet i rëndësishëm për skemën e Aguirres”.
Para se të lëndohej, Muriqi ishte shënuesi më i mirë te Mallorca. Në 12 paraqitje në La Liga, Muriqi ka shënuar katër gola dhe ka bërë dy asistime, ndërsa Mallorca aktualisht zë vendin e 14-të në tabelë me 18 pikë të mbledhura.