Të hënën është vendosur që të mbahet seanca e radhës plenare për buxhetin e Kosovës për vitin 2025.
Kështu është vendosur në mbledhjen e Kryesisë së Kuvendit e cila është mbajtur sot.
Shefi i Grupit Parlamentar të LDK-së, Arben Gashi, ka thënë se nuk do të votojnë buxhetin, derisa ka shtuar se kjo parti do të jetë prezente në sallë.
Gashi tha se nuk do ta votojnë buxhetin në formën që është tani, por shtoi se do të japin “vërejtjet, propozimet dhe nëse merren në konsideratë do ta shohim si mundësi”.
“U vendos që ditën e hënë të këtë seancë me një pikë të vetme në rendin e ditës, diskutimin e buxhetit të Republikës së Kosovës për vitin 2025. Pra do të jetë një seancë dinamike, e cila e ka një fokus të veçantë”, tha ai.
Ndërsa, shefi i Grupit Parlamentar të AAK-së, Besnik Tahiri ka deklaruar se do ta kundërshtojnë fuqishëm këtë buxhet, derisa ka shtuar se i njëjti duket të rishikohet nga Qeveria e ardhshme.
“Buxheti i kësaj qeverie është buxheti i cili e konfirmon mbytjen e zhvillimit ekonomik. Është buxhet i cili ja ka varros shpresën 80 mijë njerëzve që punojnë në shtet, është buxhet që nga ne do të kundërshtohet fuqishme dhe është buxhet që duhet të rishikohet në mars të vitit te ardhshëm. Nuk ka mundësi ky ligj as të përmirësohet më. Për tu përmirësuar duhet së paku të ndodhen nga 50 amandamentime që do të rregullonin prej pagave e deri te çështjet më minore. Ne nuk e votojmë këtë buxhet”, ka deklaruar Tahiri.
Qeveria e Kosovës, më 30.10.2024, ka miratuar Ligjin për Buxhetin për vitin 2025 me vlerë prej 3.6 miliardë euro./teve1.info
