Kryeministri Albin Kurti ka zhvilluar një takim me grupin e të Gjelbërve në Parlamentin Evropian, kryesuar nga nënkryetarja e të Gjelbërve në Parlamentin Evropian, Alexandra Geese.
Rrugëtimi i Kosovës në procese integruese ishte kryetemë e takimit, me Geese që shprehu mbështetjen e grupit që i takon për avancimin e Kosovës në këto procese.
“Nënkryetarja Geese riafirmoi se e mbështesin aplikimin e Kosovës në Bashkimin Evropian si dhe shprehu kënaqësinë që më në fund procesi i liberalizimit të vizave po shkon drejt fazave përfundimtare”, thuhet në komunikatën e Zyrës së Kryeministrit.
Veç tjerash temë diskutimi ishte edhe propozimi evropian e takimi i 18 marsit në Ohër.
“Kryeministri Kurti theksoi që Republika e Kosovë mbetet palë konstruktive, aktive dhe e përkushtuar sipas parimeve të demokracisë dhe vlerave të Bashkimit Evropian”, thuhet tutje në komunikatë.
Përkrah Kryeministrit Kurti në këtë takim ishin ambasadori i Kosovës në Bruksel, Agron Bajrami, zëvendësministri i Punëve të Jashtme dhe Diasporës, Kreshnik Ahmeti dhe deputetja njëherësh Kryetare e Komisionit për Mjedis, Ushqim, Bujqësi, Planifikim dhe Zhvillim, Fitore Pacolli.
