Delegacionet e Kosovës dhe Serbisë, të enjten do të takohen në Bruksel, për të gjetur një zgjidhje rreth zbatimit të rregullores së BQK-së.
Këtë e ka bërë të ditur i dërguari i BE-së për dialogun Miroslav Lajçak, i cili e vlerësoi të dobishëm takimin e javës së kaluar.
“Vazhduam diskutimet tona për gjetjen e një zgjidhjeje të zbatueshme për njerëzit e prekur nga vendimi i Bankës Qendrore të Kosovës. Në përgjithësi, ka qenë një takim i dobishëm. Të dyja palët patën mundësinë të shpjegojnë idetë dhe qëndrimet e tyre. Në fund erdhëm në përfundim se do të nevojitet një takim tjetër. Të dy palët do të jenë në Bruksel këtë javë dhe shpresoj se do të jemi në gjendje të kapërcejmë mosmarrëveshjet e mbetura të enjten”, ka shkruar ai.
Javën e kaluar është zhvilluar takimi në nivel të kryenegociatorëve në Bruksel. Pas takimit u tha se ka nevojë edhe për një takim tjetër.
