Policia ka ndaluar për kontroll një “Golf 7” me tre persona në fshatin Prush të Gjakovës, por të dyshuarit janë larguar me shpejtësi sapo kanë vërejtur zyrtarët policorë.
Sipas raportit 24-orësh, tre personat në veturë ishin burra dhe shtetas të huaj. Gjatë largimit, ata kanë lënë në njësinë policore dokumentet dhe telefonat e tyre.
Pas veprimeve të Policisë, vetura është lokalizuar, ndërsa është konstatuar se gjatë arratisjes të dyshuarit kishin shkaktuar edhe vetaksident.
Vetura është konfiskuar, ndërsa tre personat vazhdojnë të jenë në arrati. Për rastin është njoftuar edhe Prokurori Kujdestar.
“Njësia Policore ka ndaluar veturën Golf-7 në të cilën ishin tre persona meshkuj, veturën e drejtonte një shtetas i huaj me dy pasagjerë, shtetas tjerë. Në momentin kur të dyshuarit kanë kuptuar se do t’ju kontrollohet vetura, vozitësi ik me shpejtësi nga vendi i ndalimit, ndërsa dokumentacioni dhe telefoni i të dyshuarve mbesin tek njësia policore. Policia ka arritur të identifikoj lokacionin e veturës ku është verifikuar se të njëjtit kane shkaktuar edhe vet aksident gjate ikjes. Vetura është konfiskuar ndërsa të dyshuarit janë në arrati”, thuhet në njoftimin e policisë./teve.info/
