Të dielën është seanca për formimin e Qeverisë së Kosovës.
Nga ora 10 e mëngjesit, ligjvënësit do të mblidhen për të votuar pro ose kundër Qeverisë Kurti III.
E mandatari i Lëvizjes Vetëvendosje, Albin Kurti ende nuk ka bërë hapa për koalicione partiake.
Publikisht, nga Vetëvendosje nuk kanë treguar nëse kanë zhvilluar takime me ndonjë prej subjekteve politike.
Madje zëdhënësi i VV-së, Arlind Manxhuka nuk tregoi as se kur janë zhvilluar takimet dhe me cilën prej partive.
“Nuk është se mund të ndajmë detaje në këtë fazë. Siç e dimë afati 15 ditësh për formimin e Qeverisë përfundon këtë të diel, ndërkohë që po bëhen të gjitha përpjekjet për të siguruar numrat e nevojshëm për formimin e Qeverisë së Republikës së Kosovës në seancën që do ta kemi të dielën”.
E hulumtuesi i Institutit Demokratik të Kosovës, Vullnet Bugaqku vlerëson se nuk po shihet vullnet nga mandatari i parë.
Kësisoj sipas tij vendi është drejt zgjedhjeve të reja.
Bugaqku thotë se po përdoret taktika për sigurimin e votave me deputetë individual dhe jo me subjekte partiake.
Mandatari i parë, në këtë rast i Lëvizjes Vetëvendosje, Albin Kurti ka pasur kohë 15 ditë për formimin e Qeverisë së re.
Aktualisht, partia e Kurtit i ka në Kuvendin e Kosovës 48 ulëse të siguruara nga zgjedhjet e fundit.
Nga ajo që dihet deri më tani, përkrahje atij i kanë dhënë edhe shtatë deputetë të pakicave dhe nënkryetari i Kuvendit nga komuniteti serb, Nenad Rashiq.
