Fluks i shtuar i udhëtarëve është regjistruar në disa pika kufitare të Kosovës, ndërsa pritjet më të gjata po vazhdojnë në pikën Dheu i Bardhë.
Sipas të dhënave të fundit nga Qendra Kombëtare për Menaxhimin e Kufirit, qytetarët që po hyjnë në Kosovë përmes kësaj pike po përballen me pritje nga 50 deri në 60 minuta, ndërsa për dalje pritjet arrijnë deri në 40 minuta.
Ngarkesë është raportuar edhe në pikën kufitare Muçibabë, ku pritjet për hyrje shkojnë deri në 30 minuta, ndërsa për dalje deri në 60 minuta.
Në pikën kufitare Hani i Elezit, pritjet janë më të shkurtra dhe arrijnë deri në 20 minuta.
Ndërkohë, në pikat e tjera kufitare situata paraqitet më e qetë, me kohë pritjeje që variojnë nga 3 deri në 10 minuta. Autoritetet vazhdojnë monitorimin e gjendjes për shkak të fluksit të lëvizjeve gjatë kësaj periudhe.
