Ky ndriçues nuk është ndezur tash e katërmbëdhjetë ditë.
Shtëpia në lagjen Kalabria, në të cilën jetojnë katër familje është e vetmja e cila nuk ka asnjë dritë ndezur në mesin e shumë ndërtesave përreth, dhe nuk po furnizohen me energji elektrike tash e dy javë.
Sipas pronarit, Bastri Tërnava pas ndërtimeve në atë zone, shtyllat elektrike në këtë pjesë janë larguar dhe kabllot për energji elektrike janë vendosur nën tokë. Derisa pas kalimit të kamionëve me pesha të rënda, dheu është shembur dhe ka shkaktuar këtë problem.
E për familjen Tërnava nuk është hera e parë që ballafaqohen me këtë problem, meqë kishte ndodhur dhe herave tjera.
Si pasojë e mungesës së rrymës, vëreheshin edhe dëmet e shkaktuara.
Ata u detyruan që gjërat ushqimore të i largojnë nga frigoriferi, pasi që ai tashme nuk është në funksion.
E duke u munduar të gjejë një zgjidhje, Tërnava bëri kërkesa të shumta.
Por sipas tij, nuk është marrë parasysh nga askush deri më tani.
Përmes një përgjigjje elektronike nga KEDS thonë se para disa muajsh u kanë ofruar ndihmë për të njëjtin problem, por tani nuk është përgjegjësi e tyre.
“Bëhet fjalë për një zonë ku dheu rrëshqet vazhdimisht dhe po shkakton dëme. Pavarësisht këtyre rrethanave, KEDS i kishte ndihmuar para disa muajve konsumatorit tanë, kur kishte rrëshqitur dheu dhe kishte vendosur kabllon e re. Megjithatë, dheu ka rrëshqitur sërish, çka tregon se kjo zonë është e paqëndrueshme dhe afektohet nga konfiguracioni i terrenit. KEDS nuk është kompani e specializuar për heqjen e dheut e as për standardizim të ndërtimeve”, thuhet në përgjigjen e KEDS-it.
Lidhur me rrëshqitjen e dheut, Teve ka tentuar të marrë përgjigjje nga Komuna e Prishtinës, por të njëjtit nuk kanë qenë të qasshëm dëri në publikimin e kësaj kronike.
Kronika e gazetares Lendrina Kodrolli.
