Presidentja e Komisionit Evropian, Ursula von der Leyen, të martën ka thënë se BE-ja do të japë një përgjigjje “të palëkundur, të bashkuar dhe proporcionale” ndaj kërcënimit të Presidentit të SHBA-së, Donald Trump.
Ajo foli në Forumin Ekonomik Botëror që po mbahet në Davos, ku po merr pjesë bashkë me liderë të tjerë evropianë.
Duke komentuar mbi tarifat e propozuara amerikanë ndaj tetë vendeve evropiane, ajo i cilësoi ato si një “gabim”, dhe përmendi marrëveshjen tregtare mes BE-së dhe SHBA-së, të bërë korrikun e vitit të kaluar.
“Në politikë, ashtu si në biznes, një marrëveshje është një marrëveshje. Dhe kur miqtë shtrëngojnë duart, kjo duhet të ketë një kuptim”, tha ajo, duke shtuar se evropianët i konsiderojnë amerikanët “jo vetëm aleatë, por edhe miq”.
Ajo ripërsëriti mbështetjen e plot të BE-së ndaj Grenlandës dhe Danimarkës, dhe insistoi që integriteti dhe sovraniteti i tyre territorial është i padiskutueshëm.
Në të njëjtën kohë ajo tha se BE-ja po punon për “një rritje masive të investimeve evropiane në Grenlandë”.
Megjithë këtë, ajo përmendi se Evropa mbetet e përkushtuar të punojë me SHBA-në dhe partnerët e saj për sigurinë e gjerë të arktikut.
Von der Leyen përfundoi duke theksuar nevojën që Evropa të pavarësohet, që të jetë në gjendje të përballet me rrethanat e reja të krijuara në botë.
” Çështja është se bota ka ndryshuar përgjithmonë. Ne duhet të ndryshojmë bashkë me të.”
