Nga sheshi drejt qeverisë ia mësyu në këmbë. Në këtë formë, i dërguari i bashkimit evropian për dialogun Kosovë –Serbi, Miroslav Lajçak, mesditen e së hënës arriti tek objekti i qeverisë së Kosovës.
Këtu për ta pritur nuk doli shefi i ekzektuvit, Albin Kurti. Por drejt zyres se tij, ai u shoqërua nga ekipi i protokollit.
Sllovaku nuk u prononcua, as kur doli nga takimi.
Por, çka u bisedua në takimin njëorësh, treguan nga Zyra e Kryeministrit, përmes një komunikate për media,
“Kryeministri Kurti dhe Përfaqësuesi Special i BE-së, z. Lajčák folën edhe për marrëveshjen mbi zbatimin e udhërrëfyesit të energjisë sipas marrëveshjeve të vitit 2013 dhe 2015. Ai theksoi angazhimin e Qeverisë në zbatimin e tij, me qëllim të përfundimit të një problematike të trashëguar, tё furnizimit dhe pagesës sё energjisë në katër komunat në veri tё vendit”, thuhet në njoftimin e Qeverisë.
Kjo ishte edhe vizita e parë e Lajcak në Kosovë, që nga arritja e marrëveshjes për energjinë në Bruksel.
Ndërsa analistët, thonë se pas saj, mund të ndodh edhe takimi i nivelit të lartë ne kryeqendrën evropiane.
“Parlajmerimi për një takim mes Kurtit e Vucic, është i vjeter, mund të ndodh, por kjo është më shumë për arritjen e marrëveshjeve për cështjet tjera, sic jane të pagjeturit apo asociacioni”, tha analisti Belgzim Kamberi.
Por, a mundet dialogu Kosovë –Serbi, të marrë epilog final në këtë vit?
“Brenda këtij viti kalendarik është e pamundur të ketë marrëveshje për faktin se ka një mori temash të cilat janë akoma të pambyllura dhe të cilat pa u përafruar ato tema të papërfunduara nuk mund të ketë një marrëveshje gjithëpërfshirëse ndërmjet Kosovës dhe Serbisë”, tha Shqiprim Pula, njohës i marrëdhënieve ndërkombëtare.
Miroslav Lajçak, do të qëndrojë në Kosovë deri të mërkurën.
Ndërsa ka në plan të takohet edhe me partitë opozitare dhe ta vizitojë Prizrenin dhe komunat në veri të vendit.
Raporti i gazetarit Fidan Zejnullahu
