Altin Krasniqi, djali i ish-kryetarit të Kuvendit të Kosovës, Jakup Krasniqi, ka reaguar pas aktgjykimit të Gjykatës Speciale ndaj katër ish-krerëve të Ushtrisë Çlirimtare të Kosovës.
Pas vizitës që zhvilloi tek babai i tij, Krasniqi bëri të ditur se Jakup Krasniqi u ka shprehur mirënjohje shqiptarëve për mbështetjen e tyre.
Në reagimin e tij, ai tha se të akuzuarit e kanë pritur vendimin me forcë dhe se, sipas tij, ata kanë ndërgjegje të pastër për veprimtarinë e tyre gjatë luftës.
Krasniqi e cilësoi aktgjykimin si një dënim që, sipas tij, prek edhe popullin dhe shtetin e Kosovës, ndërsa theksoi se UÇK-ja do të mbetet krenari për shqiptarët.
“Ky nuk është dënim për ta, sepse fitoren e tyre e kanë fituar në qershor të vitit 1999 dhe më 17 shkurt 2008”, shkroi ai.
Reagimi i tij vjen pas vendimit të Speciales për dënimin e katër ish-krerëve të UÇK-së me një total prej 81 vitesh burgim.
