Pas përfundimit të takimit me presidenten Vjosa Osmani për media u deklarua edhe kryetari i Partisë Demokratike të Kosovës, Memli Krasniqi.
Ai tha se takimi i ftuar nga presidentja për të diskutuar rreth mundësisë ose jo rreth një mandatari të ardhshëm përfundoi dhe se mesazhi më i rëndësishëm ishte se askush nuk mundet të krijojë shumicën e re parlamentare, bazuar në legjislaturën aktuale.
“Së paku 52 deputetë të përfaqësuar nga partitë në vend kanë bërë të qartë se s’janë pjesë e asnjë shumice dhe besoj se kjo do të duhej të ishte e mjaftueshme që sot edhe presidentja e vendit të vinte në një konkludim të tillë e pastaj të vepronte në drejtim të shpalljes së zgjedhjeve që tashmë janë të imponuara.E për një situatë të tillë ka muaj që si PDK kemi diskutuar e paralajmëruar.Ne e bëm të qartë se si PDK s’kemi arritur ndonjë marrëveshje dhe imponohet zgjedhjet e parakohshme dhe kemi kërkuar që kjo të ndodhë sa më shpejtë duke pas parasysh se Kosova ka nevojë për stabilitet e qeveri të ri. Çështjet që ndërlidhen me buxhetin e marrëveshjet ndërkombëtare sidomos për Planin e Rritjes janë tema që do të duhej të trajtohen shumë shpejtë e do të duhej të bëheshin nga një kuvend i ardhshëm.Shpresoj shumë që më së largu deri me datë 5 edhe në kuptimin formal e legal nga ana e presidentes të merret vendimi i cili e përcakton edhe shpalljen e datës së zgjedhjeve dhe sa i përket PDK-së themi se e diela e parë brenda afatit duhet të jetë edhe data e zgjedhjeve të ardhshme. Kurti na humbi 8 muaj me manipulim e taktizim, e tani po i kërkon edhe disa ditë”,deklaroi Krasniqi.
“Në mënyrë të kundërligjshme sipas Supremes po rri në zyrën e kryeministrit e po merr vendime që nuk janë në pajtim me ligjin siç është edhe projektbuxheti e konsideroj se zgjatja e kësaj situate është arsyeja themelore sepse është e qartë se as në ëndrrat e tij s’mund ta bëjë shumicën, gjë që ua thash më 17 prill këtu në Kuvend”,tha ai.
Krasniqi u shpreh u bindur se në zgjedhjet e ardhshme do korrin fitore.
“Do ta krijojmë qeverinë e re pa Albin Kurtin e pa Vetëvendosjen. PDK ka synim ti fitojë zgjedhjet e të drejtojë vendin me stabilitet”.
