Liderët e vendeve të rajonit, aspiruese për anëtarësim në Bashkimit Evropian, si dhe përfaqësues të vendeve tanimë anëtare të BE-së, të hënën janë mbledhur në Greqi, me ftesë të kryeministrit grek, Kyriakos Mitsotakis.
Kosova në këtë darkë joformale përfaqësohet nga kryeministri Albin Kurti, e ku temë diskutimi do të jetë e ardhmja evropiane për Ballkanin Perëndimor. Në këtë takim, që po mbahen në 20 vjetorin e Samitit të Selanikut, ku Ballkanit iu premtua perspektiva evropiane, do të marrin pjesë edhe presidenti i Serbisë Aleksandar Vuçiq, ai i Malit të Zi Jakov Milatovic, kryeministri i Maqedonisë së Veriut, Dimitar Kovacheski, si dhe kryetarja e Këshillit të Ministrave të Bosnjës dhe Hercegovinës, Borjana Kristo.
Presidentja e Komisionit Evropian, Ursula von der Leyen dhe presidenti i Këshillit Evropian, Charles Michel kanë konfirmuar gjithashtu pjesëmarrjen në darkën e sotme që do të fillojë nga ora 20:15. Në këtë ngjarje të thirrur nga kreu grek, do të marrin pjesë edhe liderët e vendeve që janë anëtare të BE-së, si kryeministri i Bullgarisë, Nikolai Denkov, ai i Kroacisë, Andrej Plenkoviq, dhe i Rumanisë, Marsel Ciolacu.
Shqipëria e ftuar në nivel presidenti nuk do të përfaqësohet në këtë takim, për shkak të agjendës së paracaktuar.
Në bazë të agjendës së takimit, është bërë e ditur se të martën kryeministri i Kosovës, Albin Kurti, do të ketë një takim me kryeministrin grek, Mitsotakis në ora 10:45. Por, në një përgjigje nga ana e Qeverisë thuhet se mund të ketë edhe takime të tjera.
“Kryeministri Kurti ka udhëtuar për në Athinë ku do të marrë pjesë në darkën e ftuar nga kryeministri grek, Mitsotakis me liderët e Ballkanit Perëndimor, që po mbahet në 20 vjetorin e Samitit të Selanikut. Gjatë qëndrimit atje do të zhvillojë edhe disa takime për të cilat do të njoftoheni me kohë”, njoftoi Qeveria.
Delegacionit serb në anën tjetër ka paralajmëruar se gjatë kësaj jave i pret një presion i madh diplomatik, për të vendosur sanksione ndaj Rusisë. Madje zyrtarët serbë kanë aluduar se takimi në Greqi do të jetë fillimi i këtij presioni.
