Kryeministri shqiptar, Edi Rama, i mblodhi në Tiranë liderët e Ballkanit Perëndimor.
Në këtë takim jo-formal të thirrur nga Rama, mungoi vetëm Kryeministri i Kosovës, Albin Kurti.
Ky i fundit vendosi të marrë pjesë në një konferencë në Kretë të Greqisë.
Megjithatë ky takim në kuadër të Procesit të Berlinit, u mbajt edhe pa të.
Pas përfundimit të këtij takimi, Kryeministri Rama publikoi një fotografi së bashku me liderët e tjerë e Ballkanit Perëndimor.
Megjithatë, para gazetarëve u pyet për mungesën e Kurtit në këtë takim.
Rama tutje tregoi se ka filluar të formësohet dhe një plan i ri mbështetje financiare dhe ekonomike për Ballkanin Perëndimor nga blloku evropian.
Lidhur me Procesin e Berlinit shkroi në Twitter Komisioneri për zgjerim i Bashkimit Evropian, Oliver Varhelyi, i cili ishte prezent në takimin me liderët e Ballkanit Perëndimor.
“I ftuar nga Kryeministri Edi Rama në Tiranë për të diskutuar se si të përshpejtohet integrimi ekonomik dhe social i shteteve të Ballkanit Perëndimor. Së bashku me Kryeministrat folëm mbi Strategjinë e Re të Rritjes për Ballkanin Perëndimor. Ne jemi të përkushtuar që ta zbatojmë shpejt këtë plan”, tha ai.
Në tetor të këtij viti, Shqipëria do të mirëpres samitin e parë të Procesit të Berlinit jashtë Bashkimit Evropian.
