Presidenti i Tajvanit, Lai Ching-te, njoftoi të mërkurën një buxhet të posaçëm prej 40 miliardë dollarësh për blerjen e armatimit, duke përfshirë ndërtimin e një “Kupole të Tajvanit”, një sistem mbrojtjeje ajrore me aftësi të përparuara zbulimi dhe përgjimi.
Ky vendim vjen në një kohë kur Shtetet e Bashkuara kanë ushtruar presion mbi ishull që të rrisë shpenzimet e tij të mbrojtjes.
Buxheti do të shpërndahet përgjatë tetë viteve, nga viti 2026 deri në vitin 2033, dhe pason zotimin e Presidentit Lai për të rritur shpenzimet e mbrojtjes në 5% të PBB-së, si pjesë e strategjisë së tij përballë kërcënimeve të vazhdueshme të Kinës për një pushtim të mundshëm.
“Kërcënimet e Kinës ndaj Tajvanit dhe rajonit Indo-Paqësor po përshkallëzohen,” tha Lai të mërkurën, citon AP.
“Kohët e fundit, lloje të ndryshme ndërhyrjesh ushtarake, zonash gri detare dhe fushatash dezinformimi kanë ndodhur në Japoni, Filipine dhe përreth Ngushticës së Tajvanit, duke shkaktuar shqetësim të thellë për të gjitha palët në rajon.”
Ai shtoi: “Tajvani, si pjesa më e rëndësishme dhe më kritike e zinxhirit të parë të ishujve, duhet të demonstrojë vendosmërinë tonë dhe të marrë përsipër një përgjegjësi më të madhe në vetëmbrojtje,” duke iu referuar vargut të ishujve që shtrihen nga Deti i Kinës Lindore pranë Japonisë deri në Filipine në Oqeanin Paqësor.
Aktualisht, Tajvani ka planifikuar të rrisë buxhetin e mbrojtjes në 3.3% të PBB-së për vitin 2026, duke ndarë 31.18 miliardë dollarë.
Presidenti i SHBA-së, Donald Trump, ka kërkuar që Tajvani të rrisë shpenzimet e mbrojtjes deri në 10% të PBB-së, një përqindje më e lartë se ajo e SHBA-ve apo e aleatëve kryesorë të tyre.
Tajvani, një ishull i vetëqeverisur, pretendohet nga Kina. Në vitet e fundit, Kina ka dërguar çdo ditë avionë luftarakë, anije dhe dronë drejt ishullit gjatë stërvitjeve ushtarake, si pjesë e përpjekjeve për të rritur presionin ndaj tij.
