Ministri i Jashtëm i Italisë, Antonio Tajani ka thënë se Italia është e gatshme t’i ndihmojë vendet e Ballkanit Perëndimor që të anëtarësohen në Bashkimin Evropian.
Madje ai ka premtuar që Italia do të jetë zëdhënëse e kërkesës dhe dëshirës së vendeve të Ballkanit Perëndimor për anëtarësim.
“Diskutimi zbuloi qartë nevojën për të punuar së bashku për integrimin në mekanizmat dhe jetën institucionale të Bashkimit Evropian që nga fazat fillestare të procesit të negociatave, veçanërisht në sektorët kyç si energjia dhe tranzicioni dixhital, infrastruktura, arsimi dhe hulumtimet. Disa nga kolegët e mi thanë: “Ne duam të ndihmojmë në vendosjen e etapave të këtij rrugëtimi, jo thjesht t’i ndjekim ato”. Unë e mbështes këtë qasje, e cila duhet të përfshijë të 6 vendet në krijimin e fazave të ardhshme të procesit të integrimit”, ka thënë Tajani në një tekst autorial për Blic.rs.
Sipas tij Ballkani nuk mund të pres më, përcjell teve1.info.
“Unë jam optimist për rezultatet që mund të arrihen, sepse ne kemi parë gatishmërinë e të gjithëve për të punuar së bashku, për të ndërtuar një sinergji që mund t’i sigurojë rajonit një të ardhme paqeje dhe prosperiteti, duke punuar për të thyer barrierat që kufizojnë lëvizjen e lirë të njerëzve, mallrave, shërbimeve dhe kapitalit, me qëllim arritjen e tregut të përbashkët rajonal si hapi i parë drejt integrimit në tregun e përbashkët të BE-së”, ka deklaruar ai tutje.
“Italia synon të zhvillojë një veprim shumëdimensional ndaj rajonit të Ballkanit. Në planin politik, ne do të vazhdojmë të forcojmë marrëdhëniet dypalëshe me secilin vend të Ballkanit Perëndimor, ndërsa në Bruksel do të jemi zëdhënësit e kërkesave të tyre dhe dëshirës së tyre të fortë për anëtarësim në BE”, thuhet në kolumnën e tij.
