Shefi i Grupit Parlamentar të Partisë Demokratike të Kosovës, Abelard Tahiri, në seancën e jashtëzakonshme për të shqyrtuar themelimin e Komisionit Hetimor për kontratat njëburimore, kërkoi përkrahjen e deputetëve për themelimin e këtij komisioni.
Gjatë seancës plenare në Kuvend, Tahiri deklaroi se kjo çështje patjetër duhet t’i adresohet Prokurorisë, në mënyrë që t’a vlerësojnë se a është i arsyeshëm nënshkrimi i atyre kontratave njëburimore.
“Në hulumtimin që kemi bërë si grup parlamentar i PDK-së, për dy vite 2022-2023, janë rreth 220 kontrata njëburimore në vlerë totale 153 milionë euro. Ne si deputetë duhet të vijmë në përfundim me një raport përfundimtar, duhet ta adresojmë këtë çështje drejt Prokurorisë dhe duhet ta shohim se sa janë të arsyeshme këto kontrata. Prandaj është shumë e rëndësishme që sot si deputetë të Kuvendit të Kosovës, së bashku të vijmë në përfundim që sot ky Komision Hetimor të themelohet dhe të bëjë punën e vet me hetimin parlamentar për të gjitha ministritë dhe ndërmarrjet publike”, potencoi Tahiri para deputetëve.
Tutje, thirrësi i kësaj seance, tha se të gjitha kontratat njëburimore janë nënshkruar pa asnjë transparencë, duke shtuar se kanë shuma marramendëse.
“Deri në 200 milionë euro shkon shifra e kontratave njëburimore nga kjo qeveri. Duhet t’i analizojmë këto kontrata dhe të shohim sa janë reale. Janë kontrata njëburimore me shuma marramendëse. Shohim sigurimin e objekteve të KEK-ut, e çështje banale që janë kontratat burimore. Kontratat njëburimore janë kontrata të nënshkruara në një tavolinë duke fshehur transparencën. S’ka transparencë”, u shpreh tutje Tahiri./
Po ashtu, Tahiri vlerësoi se ky Komision është shumë i rëndësishëm në interes të Kosovës dhe të gjithë qytetarëve./teve1.info/.
