Shefi i Grupit Parlamentar të PDK-së, Abelard Tahiri, tha se që nga ardhja në pushtet e Qeverisë aktuale, delegacione nga Qeveria e Shteteve të Bashkuara të Amerikës, s’kanë ardhur më për vizitë në Kosovë për kremtimin e përvjetorit të Pavarësisë më 17 shkurt.
Madje, Tahiri potencoi se deklaratat e Ndihmës sekretarit amerikan të Shtetit, James O’Brien, janë kërcënim për shkëputje të partneritetit me Qeverinë Kurti, por jo me shtetin dhe qytetarët e Kosovës.
Tutje, ai vlerësoi që më s’ka kuptim as votimi i marrëveshjeve ndërkombëtare, për aq kohë sa Kosova vazhdon të sanksionohet.
“Qëndrimi i para dy netëve të Jimmy O’brien, është i papranueshme. Ata janë duke e kërcënuar direkt Qeverinë e Kosovës për shkëputje të partneritetit, por fatmirësisht jo shtetin dhe qytetarët e Kosovës. Nuk mund të rrimë duarkryq karshi kësaj situatë. Sot i kemi një numër të marrëveshjeve ndërkombëtare, po çfarë kuptimi ka votimi i atyre marrëveshjeve, kur Kosova po sanksionohet çdo ditë. Asnjëherë përvjetor më të zbehtë të pavarësisë s’kemi pasur. Deri në vitin 2018, në çdo vit, në çdo përvjetor të Pavarësisë, kemi pasur delegacione nga Qeveria e Shteteve të Bashkuara të Amerikës për vizitë në Kosovë për të festuar së bashku me ne kremtën e përvjetorit të Pavarësisë. Është hera e parë, që kur ka ardhur kjo qeveri në pushtet, asnjë delegacion nuk vije për të festuar ditën e Pavarësisë së Kosovës”, deklaroi Tahiri gjatë seancës plenare në Kuvend.
Kujtojmë se më 1 shkurt ka hyrë në fuqi Rregullorja e Bankës Qendrore të Kosovës, e cila vendos që vetëm valuta euro të përdoret për pagesa me para të gatshme.
Edhe pse ambasadori britanik, Nicholas Abbot, ka përkrahur vendimin e Qeverisë së Kosovës për ndalimin e dinarit serb, njëjtë nuk u mirëprit nga Ndihmës Sekretari amerikan i Shtetit, James O’Brien, i cili ka thënë se Shtetet e Bashkuara janë shumë të shqetësuara me këtë vendim./teve1.info/.
