Shefi i Grupit Parlamentar të Partisë Demokratike të Kosovës, Abelard Tahiri, vlerëson se “rritja” e paralajmëruar e pagave nga Qeveria Kurti nuk i mbulon dështimet në ekonomi dhe rënien e standardit të jetesës.
Sipas Tahirit, kjo rritje e premtuar është shumë e vogël për të zgjidhur sado pak nivelin varfërisë së ekonomive familjare.
“’Rritja’” e paralajmëruar e pagave nga qeveria në shkuarje, nuk i mbulon dështimet në ekonomi dhe rënien e standardit të jetesës. Kjo rritje e premtuar është tejet e vogël për të sanuar sado pak nivelin e varfërisë së ekonomive familjare i cili është rezultat i rritjes së çmimeve të produkteve, çmimit të energjisë elektrike, rritjes së tatimit në pronë dhe politikave të gabuara që kjo qeveri i ka miratuar”, ka shkruar ai në Facebook.
Më tej, ai ka lavdëruar kandidatin e PDK-së për kryeministër të Kosovës, Bedri Hamza, për të cilin ka thënë se në kohën kur ishte ministër i financave ka rritur pagat e të gjitha kategorive shoqërore në përqindje të madhe.
“Ndërkaq, në kohën kur financat e shtetit i menaxhonte Bedri Hamza, asokohe Minister financash, ne pak muaj Kryeministri i ardhshëm i Kosovës, i rriti pagat e mjekëve 87%, të arsimtarëve 89% pagat e infermierëve 133%, pagat e policëve 139% dhe të gjitha kategorive të tjera shoqërore. Në të njëjtën kohë, pa marrë asnjë cent borxh, kemi ndërtuar dy autostrada që kanë transformuar vendin, kemi sjellur investitorë të medhenj në aeroport dhe energjetikë dhe kemi zvogëluar papunësinë për 30%. Këto nuk janë statistika propagandistike. Të gjithë qytetarët i mbajnë ne mend rritjet e pagave nga Bedri Hamza, në qeveritë e udhëhequra nga Kryeministri Thaçi. Koha e premtimeve të kesaj qeverie në shkuarje ka kaluar. Koha e përparimit dhe ndryshimit po vjen me 9 shkurt”, ka shtuar ai.
Të martën, kryeministri i Kosovës, Albin Kurti, në një konferencë për media ka bërë të ditur se nga janari i vitit 2025 do të ketë rritje prej 55 euro të pagës për të gjithë punëtorët e sektorit publik.
“Ne kemi shkuar në maksimumin lejuar të rritjes buxhetore për pagat dhe kemi vendosur të mos e rrisim vleren e koeficientit por ta rrisim, koeficientin për një njësi të secilit punonjës të sektorit publik. Gjithë të punësuarit në sektorin publik pagat do të rriten për 55 euro duke filluar nga janari dhe për 110 euro nga muaji korrik i vitit të ardhshëm 2025”, ka thënë Kurti. /teve1.info./
Kurti: Nga janari rritje page prej 55 euro, ndërsa nga korriku 110
