Partia Demokratike e Kosovës dhe Aleanca anë kërkuar sot të takohen me kryesuesin e seancës konstituive të Kuvendit, Avni Dehari.
Deputeti i PDK-së, Arian Tahiri në konferencë të përbashkët për media me Besnik Tahirin nga Aleanca tha se kanë bërë ftesë publike tek kryetari i Vetëvendosjes, Albin Kurti të thirrë seancën dhe të kontituohet Kuvendi.
Sipas Tahirit, thirrja e seancës konstituive është një obligim ligjor në bazë të rregullores së punës së Kuvendit.
“I bëjmë ftesë publike edhe kryesuesit të seancës, zotit Dehari mirëpo edhe partisë Vetëvendosje e cila është duke e penguar konstituimin e Kuvendit, si rezultat i abuzimit të tyre përmes kryesuesit për mos me thirrë seancën. E cila është obligim ligjor edhe në bazë të rregullores së punës së Kuvendit mirëpo edhe Kushtetuesës që të konstituohet Kuvendi dhe të thirret seanca konstituive cdo 48 orë. Ne si Partia Demokratike e Kosovës e kemi bërë thirrjen që ai të ushtrojë detyrën e vet, ta respektoj ligjin, Kushtetutën dhe të thirrë seancën në mënyrë që të konstituohet Kuvendi”, tha Tahiri.
Ai shtoi se reagimet nga ky subjekt politik do të rriten në vazhdimësi sepse siç u shpreh ai, qasjen dhe pushtetet autoritare nuk i lejon askush.
“Situata në të cilën jemi duke kaluar, ne bashkarisht jemi duke marrë reagime dhe aktivitete publike. Sot kemi pasur një aktivitet në orët e hershme të mëngjesit si rezultat që ti bëjmë kërkesë deputetit Kurti të vijë dhe të ushtrojë detyrën e vet, me funksionalizu Kuvendin…Reagimet do të rriten vazhdimisht sepse pushtetet autoritare, qasjen autoritare nuk e lejon askush. Këtë që po e shohim, po e jetojmë, që është duke u cenuar rendi kushtetues, duke u cenuar funksionalizimi i Kuvendit të Kosovës. Nesër dikush edhe mundet me thënë ‘shko në shtëpi, dil prej pune’, mundet shteti të mbyllë një biznes. Po flasim për një situatë jonormale, të paimagjinueshme, të papërjetuar ndonjëherë në Kosovë prej vitit 1999 e këndej”, u shpreh ai.
Më tej, Tahiri potencoi se kjo është një qasje që, sipas tij, rrezikon strukturën e shtetit të Kosovës dhe një qasje që tenton të shantazhojë subjektet opozitare.
