Nënkryetari i Aleancës për Ardhmërinë e Kosovës, Besnik Tahiri ka kritikuar Qeverinë në detyrë, duke thënë se me emërimet e fundit po tejkalohet mandati dhe po cenohet rendi institucional.
Tahiri ka theksuar se një qeveri në detyrë nuk është vetëm “në pritje”, por funksionon me kompetenca të kufizuara të përcaktuara me Ligjin për Qeverinë, duke iu referuar nenit 31 të këtij ligji, i cili ndalon inicimin e procedurave të reja për emërime në pozita publike gjatë kësaj periudhe.
Sipas tij, kjo ndalesë vlen edhe pas shpërndarjes së Kuvendit, deri në formimin e një qeverie të re me legjitimitet të plotë.
Për këtë, Tahiri ka shprehur shqetësim për shpalljen e konkurseve për rreth 20 pozita të larta udhëheqëse nga qeveria në dorëheqje.
“Këto veprime jo vetëm që bien ndesh me frymën e kufizimeve ligjore, por krijojnë edhe perceptimin e kapjes së institucioneve në një moment tranzicioni, kur vendimet e mëdha duhet t’i lihen legjitimitetit të ri”, ka deklaruar ai.
Në fund, Tahiri ka theksuar se respektimi i ligjit është obligim për çdo institucion dhe bartës të pushtetit./teve1.info/
