Deputeti i Aleancës, Besnik Tahiri, ka reaguar ndaj zhvillimeve të fundit në Kuvendin e Kosovës, duke ngritur shqetësime për mungesën e transparencës dhe mënyrën e veprimit të Lëvizjes Vetëvendosje.
Tahiri ka kritikuar edhe faktin që, sipas tij, mediat nuk janë lejuar të hyjnë në Kuvend për të përcjellë nga afër zhvillimet dhe seancën. Ai ka theksuar se aktivitetet e Kuvendit janë publike dhe se gazetarët duhet të kenë qasje në to.
Sipas deputetit të AAK-së, institucionet kanë shkelur dispozitat kushtetuese lidhur me konstituimin e Kuvendit. Ai i është referuar nenit 66 të Kushtetutës, aktvendimit të Gjykatës Kushtetuese dhe nenit 140, duke argumentuar se brenda afatit prej 30 ditësh nuk mjafton vetëm nisja e procesit, por duhet të përfundojë edhe konstituimi.
Tahiri ka thënë gjithashtu se nuk është respektuar Rregullorja e Punës së Kuvendit, e cila, sipas tij, parasheh që seanca të thirret brenda 48 orësh.
“E kanë shkelur rendin kushtetues me dy këmbët. Krejt kjo është me ble kohë. Po për çka po ju vlen koha, unë nuk e di”, ka deklaruar Tahiri.
Ai ka paralajmëruar se vazhdimi i krizës institucionale mund ta çojë Kosovën drejt zgjedhjeve të reja, duke e vlerësuar situatën si shqetësuese për funksionimin normal të institucioneve të vendit./teve1.info/
