Anëtari i Kryesisë së LDK-së, Xhafer Tahiri thotë se Qeveria e ka pasur mbështetjen e LDK-së në dialog “deri kur filloi të konfrontohet me partnerët strategjikë”.
“Përballë Serbisë nuk duhet të kemi vija partiake dhe LDK i ka ofruar mbështetje Qeverisë që nga fillimi e deri në momentet kur kjo Qeveri mori theqafjen në qasjen e tyre për dialog. Që në krye të herës kërkesa e LDK-së ka qenë ju lutem koordinohuni me partnerët tanë stratëgjikë, ShBA dhe BE. Qeveria filloi një politikë konfrontimi në këto dy vitet e fundit, edhe me BE-në por posaçërisht me ShBA-në duke deklaruar që për Amerikën pyeten amerikanët e për Kosovën pyetemi ne”, ka deklaruar Tahiri.
Duke folur për draft-vizionin për Asociacionin, Tahiri ka thënë se Kurti është dashtur ta prezantonte këtë para dy vitesh, kur Kosova sipas tij e kishte në tavolinë njohjen nga Serbia.
Teksa ka shtuar se drafti i prezantuar nga ekipi menaxhues është i papranueshëm.
“Pyetja që sot shtrohet për kryeministrin është, pse nuk e prezentoi këtë vizion për draft-asociacionin para dy vitesh, kur këtë e kërkonte administrata Biden dhe e kishim njohjen reciproke në tavolinë ende. Natyrisht që ky draft që është publikuar nga grupi punues është shtet brenda shtetit, nuk duhet të pranohet, duhet të refuzohet kategorikisht. Nuk mund të lejojmë që të kemi një Asociacion që ka kompetenca të tilla të organizojë referendume, të nxjerrë ligje, të ndajë buxhet e kompetenca tjera që janë shtetërore të institucioneve shtetërorë të Kosovës”, ka deklaruar Tahiri në Ditari në Tëvë 1.
“Por ama procesi i Asociacionit është dashtë që në krye të herës të ketë autorësinë e Qeverisë. Tani që Qeveria po del me vizion është dashtur ta bëjë qysh para dy viteve. Dhe ka pasur mbështetjen e LDK-së, edhe të partive të tjera dhe e ka pasë kërkesë eksplicitëve të parterëve tanë ndërkombëtarë, ju lutem na e vendosni cili është vizioni juaj. Për dy vjet e ke shty e ke shty këtë proces, e kemi humb njohjen reciproke”, ka shtuar ai.