Në seancën e jashtëzakonshme në Kuvend po shqyrtohet propozim-rezoluta për numrin e madh të kontratave njëburimore të nënshkruara gjatë mandatit të Qeverisë Kurti.
Me ç’rast, Shefi i Grupit Parlamentar të AAK-së, Besnik Tahiri, tha se kërkojnë nga të gjithë ministrat të raportojnë se mbi çfarë baze, mbi çfarë nacionaliteti dhe arsyeshmërie, i kanë nënshkruar këto kontrata njëburimore.
Madje, Tahiri vlerësoi se ka dyshime të bazuara që në këtë çështje mund të ketë ndonjë subjekt të korrupsionit.
“Ne po kërkojmë që në rezolutën që e ka propozuar Lidhja Demokratike, po kërkojmë që këta ministra të vijnë dhe të raportojnë mbi çfarë baze, mbi çfarë nacionaliteti, mbi çfarë arsyeshmërie, i kanë nënshkruar këto kontrata njëburimore, për shkak se dyshimi është i bazuar që këtu mund të ketë subjekt të korrupsionit. Pra, lidhje të shkurtë mes organit kontraktues që është Ministria, apo çfarëdo ndërmarrje publike”, deklaroi Tahiri para deputetëve.
Po ashtu, shefi i AAK-së, theksoi se Qeveria e Kosovës, respektivisht institucionet kontraktuese, duhet të raportojnë me shkrim në mënyrë të saktë, pse i kanë lidhur këto kontrata.
E të rëndësishëm në këtë diskutim e konsideroi edhe Zyrën Kombëtare të Auditimit, për të cilët tha se duhet të angazhojnë një ekip speciale për auditimin e kësaj çështje.
“Çështja e dytë, ne kemi një institucion kushtetues që quhet Zyra Kombëtare e Auditimit, kjo zyrë ka një rol të jashtëzakonshëm, e ne kur ta ftojmë si institucion në Kuvend, kjo zyrë duhet të bëjë auditim të veçantë, një ekip speciale e cila e auditon këtë çështje. Ndoshta të gjithë mund të dalin faqebardhë”, potencoi tutje Tahiri.
Kjo rezolutë i është prezantuar Kuvendit të Kosovës nga partitë opozitare, të cilat kanë nënshkruar kërkesën për seancë./teve1.info/.
