Shefi i Grupit Parlamentar të AAK-së, Besnik Tahiri ka thënë se Pavarësia e Kosovës ishte pikë kthese e paqes dhe stabilitetit.
Tutje ai tha se pavarësia e vendit është e pakthyeshme dhe sipas tij, është detyrë që të punohet drejt familjes evropiane.
Teksa shtoi se duhet të punohet deri në bashkimin e familjes evropiane.
“Nuk mundemi pa e kujtuar Prekazin, Gllogjanin, Llaushën, Llapashticën, Dushkajën, Kosharen e shumë beteja të tjera të lavdishme. Mijëra djem e vajza që u bën arterie e furnizimit për luftën dhe mburojën e lirisë. Legjendarët tanë, Adem Jasharin, Zahir Pajazitin, Luan e Shkëlzen Haradinaj, Fehmi Lladrovcin, Agim Ramadanin, Ilir Konushevcin e shumë e shumë të tjerë që na bëjnë sot të ndihemi krenarë. Pa dyshim, kujtojmë lëvizjet mbarë popullore, studentore, politike, civile, e partiake. Kujtojmë me respekt të përjetshëm presidentin Ibrahim Rugova, i cili ishte udhëheqësi i këtij kombi në kohën e okupimit të egër të regjimit të atëhershëm. Tani e dinë të gjithë që Republika e Kosovës, pavarësia e saj është e pakthyeshme dhe është detyrë e këtij brezit të fundit, është detyrë e jona e që i përkasin edhe ne që Kosovën ta bëjmë të përfunduar, të punojmë e të bëjmë gjithçka të mundshme që ta bëjmë pjesë të familjes evropiane, NATO-s, Bashkimit Evropian dhe OKB-së. Pavarësia e Kosovës ishte pikë kthese e paqes dhe stabilitetit në këtë pjesë të Evropës. Që nga shpallja e pavarësisë kemi demonstruar me punë e fakte pjekurinë dhe maturinë në qëndrimet tona”, tha ai.
