Kandidati i Partisë Demokratike të Kosovës për kryetar të Mitrovicës, Arian Tahiri, e ka mbyllur fushatën zgjedhore me një tubim në palestrën “Minatori”, ku u bë thirrje për mobilizim të plotë në prag të ditës së balotazhit.
Para simpatizantëve dhe përkrahësve të tij, Tahiri theksoi se 9 nëntori do të shënojë fillimin e një epoke të re për qytetin, duke premtuar se çdo zotim i dhënë gjatë fushatës do të kthehet në realitet.
“Nesër është dita kur Mitrovica e nis kapitullin e ri. Nis nga të gjithë ne. Nga secili prej jush. Nga një votë. Nga një vendim. Nga një akt guximi që e kam parë çdo ditë në fytyrat tuaja. Unë, me gjithë forcën time, do ta nderoj besimin tuaj dhe do ta jetësoj çdo premtim që ua kam dhënë. E përsëris, çdo premtim që ua kam dhënë në çdo lagje e çdo fshat, për ju dhe për qytetin tonë. Shumë të respektuar mitrovicas, le ta përfundojmë këtë fushatë siç e kemi nisur. Me shpresë. Me guxim. Me besim në Zot. Për çdo qytetar të Mitrovicës, e ardhmja fillon të dielën, këtu me ne!”, ka deklaruar Tahiri.
Në balotazhin e së dielës, Arian Tahiri do të përballet me kandidatin e Lëvizjes Vetëvendosje, Faton Peci, pas një gare të ngushtë që karakterizoi edhe raundin e parë të zgjedhjeve lokale. /teve1.info/
