Shefi i Grupit Parlamentar të Aleancës për Ardhmërinë e Kosovës (AAK), Besnik Tahiri, deklaroi se në rast se nuk merren parasysh amendamentet e propozuara nga AAK, i gjithë procesi i miratimit të buxhetit do të konsiderohet si mashtrim.
Ai në seancën e Kuvendit, ku po shqyrtohet në lexim të dytë projektligjit mbi ndarjet buxhetore për Buxhetin e Republikës së Kosovës për vitin 2026, ka thënë se AAK-ja ka dorëzuar 14 amendamente, në kuadër të gjithsej 86 amendamenteve të propozuara, duke theksuar se nuk ka logjikë që një buxhet të hyjë në fuqi pa asnjë amendament.
Tahiri shtoi se nëse edhe kësaj here nuk kalon asnjë amendament i AAK-së, atëherë, sipas tij, i gjithë procesi do të konsiderohet si mashtrim.
“Ky është buxhet që është përgatitur në tetor, dhe ky buxhet është provizor, kështu është thënë prej kryeministrit, ministrit të Financave, dhe zotimi i qeverisë është se pas pak muajve do të ndodh një rishikim i madh, i rëndësishëm për këtë buxhet. Më vijë me këtë AAK në kuadër të 86 amendamenteve, që keni bërë, ne nga ta i kemi 14 amandamente, për shkak se s’ka logjik një buxhet që hyn në këtë vit mos me pas asnjë amendament. Janë kryesisht të lidhura me sektorin e sigurisë, të disa investimeve kapitale që lidhen me komuna ku ne udhëheqim, me projektin e autostradës së Dukagjinit. Ne do të presim se cili do të jetë reagimi i qeverisë. Në qoftë se edhe kësaj here nuk do të kalojë në seancë asnjë amendament i AAK-së, i krejt ushtrimi, ka qenë një mashtrim. Ne do të jemi këtu, do të lexojmë amendamentet tona dhe do të shohim a do të marrin apo jo mbështetje. Në qoftë se kemi bërë një ushtrim sa për të kaluar një buxhet, kjo është goditje e madhe që i bëhet Kosovës dhe vet funksionimit të qeverisë”, ka thënë Tahirin.
Ndryshe, më 16 shkurt, me 66 vota për, 32 kundër dhe pesë abstenime, Kuvendi i Kosovës e ka miratuar në lexim të parë projektligjin për buxhetin e Kosovës për vitin 2026.
Projektligji parasheh që buxheti i përgjithshëm i shtetit për vitin 2026 të jetë rreth 4 miliardë euro.
