Përfaqësuesi i Aleancës, Besnik Tahiri, ka kërkuar që konstituimi i Kuvendit të Kosovës të bëhet sa më shpejt, duke shprehur shqetësim për vonesat në këtë proces.
Pas takimit me ushtruesen e detyrës së presidentes, Albulena Haxhiu, dhe përfaqësuesit e partive politike, Tahiri tha se Aleanca ka ngritur dy shqetësime kryesore, lidhur me datën e konstituimit dhe mundësinë e shtyrjeve të mëtejshme.
“Ne diskutuam për mbledhjen dhe konstituimin e Kuvendit, i cili do të ndodhë më 6 gusht. Në emër të Aleancës i adresova dy tema. E para është shqetësimi i thellë dhe kërkesa që konstituimi të ndodhë menjëherë”, tha Tahiri.
Ai u shpreh se është e pakuptueshme që pas disa javësh nga certifikimi i rezultateve zgjedhore ende nuk është bërë konstituimi i institucioneve.
Tahiri paralajmëroi se çdo tentim për shtyrje përtej afatit ligjor do të dëmtonte vendin dhe do të ngrinte dyshime për qëllime politike.
“Vendi i Kosovës nuk duhet të bëjë lojëra dhe ta shtyjë konstituimin më larg se 7 gushti. Çdo tendencë për interpretim që lidhet me një afat shtesë vetëm e dëmton Kosovën dhe e konfirmon qëndrimin tonë se ky proces i zgjatjes mund të ketë qëllime zgjedhore”, deklaroi ai.
Tahiri shtoi se Aleanca do ta kundërshtojë çdo përpjekje për zvarritje të procesit të konstituimit të Kuvendit.
