Ish-kryenegociatorja e Kosovës, Edita Tahiri, ka deklaruar se kryeministri Albin Kurti synon ta hap urën për të kalua Asociacionin e Komunave me Shumicën Serbe.
Ajo tha se kjo është një përpjekje tjetër populiste e Kurtit.
“Kurti synon ta hap urën e Ibrit për ta kaluar asociacionin, përndryshe në ketë bojkot total të pakicës serbe dhe mungesës së institucioneve shtetërore të Kosovës në veri kush do të kaloj nëpër urë? Populizmi i Kurtit ka humbur rrugën në oborrin e vet…”, ka shkruar Tahiri.
Hapja e Urës së Ibrit është bërë temë diskutimi së fundmi në vend.
Për këtë çështje u fol edhe në seancën e së mërkurës në Kuvendin Komunal të Mitrovicës së Veriut.
Në këtë seancë, asamblistët e Lëvizjes Vetëvendosje kërkuan që të zbatohet vendimi për hapjen e urës kryesore mbi lumin Ibër për qarkullimin e automjeteve.
Iniciativa është nisur nga këshilltarja e këtij Kuvendi e cila vjen nga radhët e Vetëvendosjes, Aida Doli.
E nga Ministria e Admninistrimit të Pushtetit Lokal kanë thënë se hapja e urës do të bëhet këtë verë.
Zëvendëskryeministri i këtij dikasteri ka thënë në emisionin “InfoNata” në Tëvë 1 se nuk ka ende ndonjë datë të saktë, por kushtet për hapjen e saj janë krijuar.
“Me kalimin e kohës potenciali për trazira vërehet qartë se është zvogëluar. Mendoj se para vjeshtës që i bie gjatë verës. Por, datë të saktë nuk kemi. Mendoj se nuk ka nevojë të pritet vjeshta fare”, tha zëvendësministri i Administrimit të Pushtetit Lokal, Arbër Vokrri.
Lidhur me deklaratat se së shpejti do të hapet Ura e Ibrit ka reaguar edhe BE-ja, duke thënë se kjo çështje zgjidhet me dialog.
