Ish- deputeti i AAK-së, Besnik Tahiri, gjatë një konference për media ka theksuar se, sipas të dhënave që kanë marrë nga shtabet e tyre zgjedhore, procesi i zgjedhjeve po zhvillohet pa asnjë problem deri në këtë moment. Ai ka shtuar se ka një pjesëmarrje të ulët në krahasim me raundin e parë të zgjedhjeve.
“Të dhënat nga komunat tregojnë se ka pasur disa ankesa lidhur me votimin e personave me aftësi të kufizuara, të cilat i kemi adresuar tek përfaqësuesi ynë në KQZ, Muharrem Nitaj, i cili i ka trajtuar ato. Ka pasur disa probleme me asistencën gjatë votimit, ndërsa në orët e fundit, kemi vërejtur një defilim të zyrtarëve me funksione shtetërore që kanë udhëtuar në qytete të ndryshme dhe me mënyra të ndryshme kanë ushtruar ndikim”, ka thënë Tahiri.
Ai ka theksuar se kjo ditë do të shënojë një festë të madhe për AAK-në, për shkak të forcimit dhe rikthimit të saj të fuqishëm në skenën politike.
“Le ta ruajmë këtë ditë dhe të mos lejojmë që, përmes defilimit të mekanizmave shtetërorë, ta prishim këtë festë kaq të rëndësishme. Ftojmë të gjithë qytetarët të japin kontributin e tyre më të madh në këtë proces demokratik, sepse vota e secilit është momenti i gjykimit dhe i kontribuimit për të ardhmen tonë. I ftojmë gjithashtu kolegët tanë të mobilizohen. Ne jemi këtu në seli për çdo informacion dhe ky është kontributi ynë më i madh. Sot, Kosova do të ketë një verdikt demokratik. Le të jetë ai një verdikt i lirë dhe i vërtetë”, ka përfunduar deputeti Tahiri.
