Analistja politike Arta Tahiri Beqa ka deklaruar në emisionin “Këndi i debatit” në Tëvë1 se presidentja aktuale, Vjosa Osmani, e meriton të rizgjidhet edhe për një mandat tjetër.
Sipas Tahiri Beqës, kryeministri Albin Kurti dhe shumica parlamentare që ai ka duhet ta mundësojnë rizgjedhjen e Osmanit, duke pasur parasysh bashkëpunimin e tyre gjatë viteve të fundit.
Ajo tha se ekziston një vazhdimësi e bashkëveprimit politik mes Kurtit dhe Osmanit dhe se asnjë veprim i rëndësishëm nuk është ndërmarrë pa mbështetje të ndërsjellë.
“Kohët e fundit besoj se zonja Vjosa Osmani do të rizgjidhet presidente. Së pari, zoti Kurti, me deputetët që ka, duhet ta mundësojë këtë, sepse prej një viti kanë bashkëvepruar së bashku dhe asnjë veprim nuk është bërë pa mbështetjen e njëri-tjetrit. Duhet ta ndiejë edhe obligimin moral dhe politik, ashtu siç ka qenë në vitin 2021, kur kishte një premtim që Vjosa Osmani do të bëhej presidente. Ajo ka punuar mirë gjatë kësaj kohe dhe mendoj se e ka përfaqësuar vendin më së miri deri më tani. Së dyti, duhet t’i jepet një mundësi tjetër dhe, së treti, mendoj se edhe LDK-ja duhet ta mbështesë, pasi Vjosa Osmani ishte në një kohë përfaqësuese e freskët e saj,” ka thënë Tahiri Beqa.
