Politologia, Arta Tahiri-Beqa ka deklaruar se nuk e konsideron serioze ofertën e kryeministrit dhe njëherësh kryetarit të Lëvizjes Vetëvendosje, Albin Kurti, drejtuar Lidhjes Demokratike të Kosovës për çështjen e presidentit dhe bashkëqeverisjes.
Në emisionin “Këndi i Debatit” në Tëvë1, ajo ka paraqitur dy arsye kryesore që, sipas saj, e bëjnë këtë ofertë joserioze.
Sipas Tahiri-Beqës, problemi i parë qëndron në formulimin e ofertës, ku është përdorur shprehja “ose” dhe jo “dhe”, duke lënë paqartësi për ndarjen e pozitave.
Ajo ka theksuar se kjo qasje nuk ofron siguri politike për palën tjetër.
“Ku nuk e shoh seriozitetin e ofertës është te fakti që pozitat e ofruara u paraqitën si katër ministri, por duhet sqaruar se nuk u tha ‘dhe’, por ‘ose’: katër ministri, zëvendëskryeministri ose kryekuvendari. Lëvizja Vetëvendosje duhet ta kuptojë edhe opozitën, e cila duhet të garojë dhe të ruajë qëndrueshmërinë politike për hir të demokracisë dhe pluralizmit. Sipas kësaj qasjeje të LVV-së, po del sikur ‘ne i kemi 51% dhe ju duhet domosdoshmërisht t’u bindeni të gjitha dëshirave dhe tekave tona”, ka thënë ajo.
Arsyeja e dytë, sipas saj, lidhet me mungesën e garancisë për qëndrueshmërinë e bashkëqeverisjes.
Tahiri-Beqa ka rikujtuar përvojën e mëhershme të koalicionit mes LVV-së dhe LDK-së, duke theksuar se ekziston rreziku që një situatë e ngjashme të përsëritet.
“E dyta, pse nuk ka qëndrueshmëri? LVV-ja, në koalicionin e kaluar me LDK-në, pavarësisht mënyrës se si u prish, kishte komoditetin ta dërgonte partnerin në shtëpi. Ndërsa oferta që i është dhënë tani LDK-së është: ministri, zëvendëskryeministri ose kryekuvendari. Në momentin që zgjidhet presidenti nga VV-ja, askush nuk i garanton LDK-së besueshmëri dhe siguri se Kurti nuk mund ta prishë këtë bashkëqeverisje brenda natës,” ka përfunduar Tahiri-Beqa./teve1.info/
