Ish-kryenegociatorja e Kosovës në dialogun me Serbinë, Edita Tahiri, ka komentuar vizitën e kryeministrit të Kosovës, Albin Kurti, dhe kryeministrit të Shqipërisë, Edi Rama, në Shtetet e Bashkuara të Amerikës, duke ngritur kritika për mungesën e takimeve me zyrtarë të administratës amerikane.
Tahiri ka thënë se fakti që Kurti dhe Rama nuk patën takime me qeveritarë amerikanë përbën, sipas saj, “një alarm për kombin dhe dy shtetet tona”.
“Arsyet dihen, Kosova në kriza politike tash dy vjet e që vazhdojnë, ndërsa Shqipëria në pellgun e korrupsioneve të pandalshme”, ka shkruar Tahiri.
Duke komentuar pjesëmarrjen e Ramës në Asamblenë e Përgjithshme të OKB-së, Tahiri ka thënë se kryeministri shqiptar kishte mundësi të fliste në këtë forum, pasi Shqipëria është anëtare e Kombeve të Bashkuara.
Ajo ka pretenduar se fjalimi i Ramës është “bojkotuar nga të gjitha vendet anëtare të OKB-së”, ndërsa ka kritikuar edhe përmbajtjen e fjalimit të tij.
“Duke mos pasur çfarë t’i thotë botës për Shqipërinë, Rama iu foli për rëndësinë e inteligjencës artificiale”, ka shkruar Tahiri.
Tahiri ka kritikuar gjithashtu Ramën për faktin se sipas saj, nuk foli për Kosovën dhe as për atë që ajo e cilëson si padrejtësi ndaj ish-krerëve të UÇK-së.
“Rama nuk foli as per Kosoven as per padrejtesine ndaj lidereve te UCK-se, se paku e kishim ndier se pati Kosova nje ze ne OKB. Sa ma e brisht gjendja ne shtet aq ma e brisht diplomacia – kjo u pa ne dyja rastet, edhe Kosova edhe Shqiperia jane ne kete gjendje, fatkeqesisht”, ka deklaruar ajo./teve1.info/
