hefi i Grupit Parlamentar të Aleanca për Ardhmërinë e Kosovës, Besnik Tahiri, e ka cilësuar si “tentim grusht-shteti” seancën e sotme për zgjedhjen e presidentit, e cila u mbajt pavarësisht mungesës së kuorumit.
Ai ka deklaruar se zhvillimet në Kuvend përbëjnë shkelje serioze të rendit kushtetues dhe rrezik për demokracinë në vend.
“Është një gabim i madh. Sot është bërë një shkelje e madhe kushtetuese. Ajo që sot kryetarja e Kuvendit dhe ushtruesja e detyrës së presidentes ndërmori, është pa asnjë dyshim një goditje e rëndë që i është bërë rendit kushtetues, duke nisur një seancë plotësisht në kundërshtim me rregullat që janë mirë të përcaktuara”, ka deklaruar Tahiri.
Ai ka theksuar se kjo situatë përbën një nga shkeljet më serioze kushtetuese.
“Kjo situatë është kaq serioze dhe kaq e rrezikshme. Është tentim grusht-shteti. Për AAK-në, ky akt shënon një ndër shkeljet më të mëdha kushtetuese, sulmi më i madh që i është bërë shtetit”, u shpreh ai.
Tahiri paralajmëroi se do të ndërmerren hapa konkretë politikë dhe institucionalë për të parandaluar situata të ngjashme.
“Ne si subjekt politik do t’i ndërmarrim të gjitha veprimet e nevojshme për të parandaluar skena të tilla dhe për të mbrojtur rendin kushtetues të Republikës së Kosovës”, tha Tahiri.
