Deputeti i AAK-së, Besnik Tahiri, ka deklaruar se partia e tij do ta mbështesë projektligjin për Byronë për Pasurinë e Pajustifikueshme.
Duke folur në Kuvend, Tahiri theksoi se AAK-ja ka votuar pro këtij projektligji edhe në Komisionin për Legjislacion dhe do ta përkrahë sërish, pasi vlerëson se një institucion i tillë mund të luajë rol të rëndësishëm në luftën kundër korrupsionit.
Ai shtoi se, megjithëse ekzistojnë disa çështje problematike që duhet të diskutohen, hyrja në fuqi e këtij ligji do të ndihmonte në vlerësimin konkret të efektivitetit të tij, sidomos në hetimin e pasurisë së zyrtarëve publikë.
Sipas Tahirit, çdo zyrtar që nuk arrin të justifikojë pasurinë e tij duhet të përballet me ligjin. “Kush nuk mund ta justifikojë as edhe një cent si zyrtar publik, duhet të ballafaqohet me forcën e ligjit,” u shpreh ai, duke shtuar se konfiskimi i pasurisë së pajustifikueshme duhet t’i kthehet qytetarëve dhe shtetit.
