Duke folur për mundësinë e nënshkrimit të planit franko-gjerman, ish-presidenti serb Boris Tadiq ka thënë se Vuçiq ka dhjetë vjet që e përgatit publikun për këtë moment.
Tadiq ka deklaruar se nëse nënshkruhet një marrëveshje e tillë nuk mund të pengohet anëtarësimi i Kosovës në OKB.
“Nuk mund të mendohet në të njëjtën kohë për pengimin e anëtarësimit të Kosovës në OKB dhe nënshkrimin e një marrëveshjeje të tillë. Në çdo rast, do të ishte shumë më e vështirë, pothuajse e pamundur, nëse do të nënshkruhej një marrëveshje e tillë. Në kohën e qeverisjes sonë kjo ishte e pamendueshme dhe as që ishte temë. Dhe ne nuk arritëm në këtë situatë brenda natës, por është rezultat i politikës katastrofike ndaj Kosovës prej një dekade të kësaj qeverie, prioriteti i së cilës ishte ruajtja e mbështetjes ndërkombëtare për krijimin e qeverisë së saj, jo ruajtja e interesave tona kombëtare. Pikërisht për ta mbuluar këtë fakt, Goebbels prej dhjetë vitesh e mbush hapësirën publike me gënjeshtra për politikën tonë “tradhtare” të Kosovës. E gjithë ajo propagandë synonte pikërisht në këtë moment dhe shërbeu si një përgatitje për publikun për të transferuar përgjegjësinë tek ish-qeveria”, ka thënë Tadiq për Danas.
Ai ka shtuar se me këto njohuri që ekzistojnë nuk do ta firmoste planin, por shtoi se nuk mund ta komentoj përmbajtjen përfundimtare përderisa nuk finalizohet, transmeton teve1.info.
“Unë nuk do të firmosja një marrëveshje siç u shfaq në publik dhe siç kisha njohuri. Megjithatë, askush nuk e di ende përmbajtjen përfundimtare të tekstit për nënshkrim, ndaj do të mund të komentoj për versionin përfundimtar vetëm kur të finalizohet. Dhe asnjë vend normal nuk pranon një shkop të cilit nuk i duket fundi për shkak të një karote në mjegull, veçanërisht nëse ai shkop nënkupton heqjen dorë nga interesat legjitime kombëtare dhe një pjesë të territorit. Krahasuar me pasojat afatgjata të një shkopi të tillë, edhe karota më e madhe është vetëm kënaqësi afatshkurtër”, ka shtuar ai.
